Австралиянинг Аделаида шаҳрида велоспорт бўйича ўтказилаётган "UCI World Women's Tour" жаҳон кубоги доирасидаги "Santos Tour Down Under 2024" мусобақасида мамлакатимиз вакиллари ҳам иштирок этмоқда.

Дунёнинг энг кучли 16 та аёллар жамоаcи ўртасидаги беллашувларда "Tashkent City" клуби спортчилари илк босқич баҳсларида 93,9 километр масофани босиб ўтди.  

Пойгалар сарҳисобига кўра, Австралиянинг "AG Insurance - Soudal Team" клуби аъзоси Алли Уолластон 2 соат, 32 дақиқа ва 27 сония билан ғалабага эришган бўлса, 2-ўрин "Liv Alula Jayco" (Австралия) аъзоси Жоржия Бейкерга насиб этди. Бирлашган Араб Амирликлари "UAE Team ADQ" жамоаси аъзоси бўлган италиялик София Бертизолла кучли учликка якун ясади, дейилади Ўзбекистон велоспорт федерацияси хабарида.  

Мусобақада иштирок этган "Tashkent City" клуби аъзоларидан Янина Кускова, Ольга Забелинская ва Маргарита Мисюрина маррага ғолибдан 10 дақиқа кеч етиб келди ва 200 нафарга яқин велоспортчилар орасида 36-48-поғоналардан жой олди.  

Мусобақанинг "Ёш велоспортчи" классификациясида ҳамюртимиз Маргарита Мисюрина 9-натижани қайд этди. Жамоавий рейтингда "Tashkent City" клуби илк босқичда 11-ўринни банд этди.  

"Santos Tour Down Under 2024" мусобақалари 21 январга қадар давом этади.  

Т.Рўзиев,  

ЎзА