Марказий банкнинг маълум қилишича, жорий йилнинг август ойида юртимиз банкларининг депозитлари қолдиғи 10,2 триллион сўмга ўсган.

Маълумот ўрнида депозит банк ва ташкилотларга жойлаштирилган пул ва қимматбаҳо қоғозлар (акция, облигациялар), қарздорнинг қарз берган ташкилотга суд маҳкамаси орқали ўтказган пул ёки қимматбаҳо қоғозлар миқдори ҳисобланади. 

Мазкур ойда ҳам депозит жамғаришда давлат банклари илғорроқ бўлишган. Халқ банки (+2,7 трлн.сўм), Асакабанк (+1,3 трлн.сўм) ва Миллий банк (+1,1 трлн.сўм) фаол ишлаган. 

Халқ банки чакана, яъни аҳоли депозитларини ҳам 1,1 триллион сўмга кўпайтира олгани жуда қизиқ. Чунки ўтган ойда банк тарафидан бозордан катта фарқ қиладиган депозитлар ё бошқа маҳсулотлар таклиф этилмаган.  

Хусусий банклар орасида Капиталбанк етакчилиги сақланиб турипти. Банк ўтган ойда депозитлар қолдиғини 826 миллиард сўмга ошира олган. Азия Альянс банк (+485 млрд.сўм) ва Ҳамкорбанк (+400 млрд.сўм) кейинги ўринларни эгаллаган. Чакана депозит жамғаришда Ипак йўли банк (+324 млрд.сўм) фаол бўлган. 

Кредит ажратиш ва депозит жамғаришда давлат банкларида катта диспропорциялар сақланиб қолаётган бўлса, хусусий банкларда мазкур дельтанинг мувозанати сақланиб турипти.

ЎзА