Хабарингиз бор, Австралиянинг Мельбурн шаҳрида теннис бўйича “Катта дубулға” туркумига кирувчи “Australian Open – 2026” мусобақаси давом этмоқда. Унда мамлакатимизнинг биринчи рақамли теннисчиси Камилла Раҳимова жуфтлик баҳсларида иштирок этяпти.

Жуфтлик учрашувларида Камилла Раҳимова россиялик Анна Блинкова билан тандем ҳосил қилган ҳолда мусобақани муваффақиятли бошлади. Илк даврада улар тайванлик Чан Ҳао-чинг ва хитойлик Жианг Хиню дуэтини 3:6, 7:5, 7:6 ҳисобида мағлуб этишга муваффақ бўлди.

Энди теннисчиларимиз 24 январь куни жуфтлик баҳсларининг иккинчи даврасида америкалик Хейли Баптист ҳамда Пейтон Стернсга қарши кортга чиқади.

Маълумот ўрнида, айни дамда мусобақанинг яккалик баҳсларида учинчи давра ўйинлари ўтказилмоқда. Унда эркаклар ўртасида Даниил Медведев (Россия), Карлос Алькарас (Испания) ва Лернер Тьен (АҚШ), аёллар ўртасида эса Арина Соболенко (Беларусь) ҳамда Юлия Путинцева (Қозоғистон) навбатдаги босқичга йўл олди.

Жавоҳир Тошхўжаев,  

ЎзА