Базардағы капитализациясы 17,4 миллиард доллар болатын ең ірі блокчейн жобаларының бірі Tron негізін қалаушы Джастин Сун 6,2 миллион долларға сатып алған бананды жеп қойды.

Джастин Сун 21 қараша күні «Comedian» деп аталған және қабырғаға жапсырылған банан бейнесіндегі арт-объектіні Sotheby's аукционында 6,2 миллион долларға сатып алған еді.

«Бұл жай ғана өнер туындысы емес: ол өнерді, мемдерді және криптовалюта қауымдастығын байланыстыратын мәдени құбылысты білдіреді. Сенімдімін, бұл жұмыс жаңа көзқарастар мен пікірталастарды шабыттандырып, тарихтың бір бөлігіне айналады», деп жазған еді Сун сатып алғаны жайлы.

«Comedian» өнердің концептуалды туындысы болып, ол қабырғаға скотчпен жапсырылған банан жемісі еді. Ол 2019 жылы Art Basel Miami Beach жәрмеңкесінде суретші Маурицио Каттелан тарапынан ұсынылған. Туындыда суретші Майамидегі азық-түлік дүкенінен сатып алынған бананды қолданған.