Өзбекстан делегациясының Кабул және Мазари-Шариф қалаларына іссапары аясында Ауғанстанда алғаш рет «Made in Uzbekistan» сауда үйінің салтанатты ашылу рәсімі өтті.

Іс-шараға екі елдің ресми өкілдері мен кәсіпкерлері қатысып, сауда үйінің Өзбекстанда өндірілген өнімдерді Ауғанстан нарығына жеткізуде және жергілікті сұранысты қамтамасыз етуде маңызды рөл атқаратыны атап өтілді.

Ашылу барысында қатысушылар назарына электротехника өнімдерінің кең түрлері мен заманауи технологиялар ұсынылды. Сарапшылар бұл сауда үйі екі ел арасындағы экономикалық байланыстарды нығайтып, өзара сауда-саттықты жандандыруға сеп болады деп санайды. Мұнда өзбек өнімдері тұрақты түрде ұсынылып, ауған тұтынушыларымен тікелей сауда байланыстары орнатылады.

Сапар аясында «Узэлтехсаноат» қауымдастығының өкілдері Кабулда электротехника саласына қатысты бірқатар іскерлік кездесулер өткізді. Кездесулерде тікелей келісімдер жасау, серіктестікті дамыту және ұзақ мерзімді жобаларды жүзеге асыру мәселелері талқыланды. Сонымен қатар, Ауғанстан нарығының нақты қажеттіліктеріне баса назар аударылды.

Қауымдастықтың баспасөз қызметінің хабарлауынша, ашылған жаңа сауда алаңы Өзбекстан өнімдерінің экспорттық әлеуетін арттыруға, жергілікті нарыққа бейімдеуге және екіжақты экономикалық ынтымақтастықты тереңдетуге мүмкіндік береді.