15-16 шілдеде Ташкентте «Орталық және Оңтүстік Азия: аймақтық байланыс. Қауіптер мен мүмкіндіктер» тақырыбындағы халықаралық конференция өтеді. Осы беделді конференцияға қатысу үшін Ауғанстан Ислам Республикасының Президенті Ашраф Ғани мен Пәкістан Ислам Республикасының Премьер-Министрі Имран Хан Өзбекстанға сапармен келеді.

Бұл туралы Өзбекстан Республикасы Президентінің баспасөз хатшысы Шерзод Асадов журналистерге арналған брифингте мәлімдеді.

Оның айтуынша, Пәкістан премьер-министрі ресми сапармен, ал Ауғанстан президенті халықаралық конференция шеңберінде жұмыс сапарымен келмек.

Атаулы конференция жұмыс аптасының ең маңызды оқиғасы болатыны сөзсіз. Онда Ауғанстан мен Пәкістан президенттері, сондай-ақ Еуропалық Одақтың сыртқы істер және қауіпсіздік саясаты жөніндегі жоғары өкілі, Еуропалық комиссияның вице-президенті Джозеп Боррелл, 20-дан астам елдің сыртқы істер министрлері, беделді халықаралық және аймақтық ұйымдардың басшылары кездесуге қатысатын болып, қатысушылардың жалпы саны 600-ден асады.

Президент Шавкат Мирзияевтің бастамасымен өткелі тұрған конференция Орталық және Оңтүстік Азия елдері арасындағы достық қатынастарды, сенім мен тату көршілік қатынастарды нығайтуға бағытталған. Осы конференцияда БҰҰ Бас хатшысы Антонио Гутерриш қатысушыларға бейне үндеу жолдайды.

Пленарлық және салалық мәжілістерде аймақтық байланыстарды одан әрі тереңдету мүмкіндіктері, соның ішінде мәдени-гуманитарлық байланыстарды қалпына келтіру арқылы аймақтық қауіпсіздіктегі қауіптер мен тәуекелдер, тұрақты өсімдегі достық пен өзара сенімді нығайту, сауда мен көлік саласындағы ынтымақтастықтың рөлі талқыланады.

Сонымен қатар, Мемлекет басшысының Ауғанстан Президентімен, Пәкістан Премьер-Министрімен, Қытай, Ресей, Үндістан, Сауд Арабиясы, Орталық Азия және басқа да елдердің, сондай-ақ ЕО сыртқы істер министрлерімен екіжақты кездесулері жоспарланған.