“Qoʻqon” erkin iqtisodiy zonasida ish boshlagan “Super Kolor Ekstra” masʼuliyati cheklangan jamiyatida ishlab chiqarilayotgan avtomobil oynalarining asosiy qismi tashqi bozorga chiqariladi. Gap shundaki, bu yerga 1 million AQSH dollari miqdorida investitsiya jalb etilib, zamonaviy ishlab chiqarish uskunalari oʻrnatildi. Talab va taklif asosida mahsulot ishlab chiqarishga kirishgan korxonada oyiga 4 ming dona mahalliy hamda xorijiy avtomobillar uchun kerakli oʻlcham hamda koʻrinishda oynalar tayyorlanmoqda.

- Korxonamizda 25 nafar yoshlar mehnat qilmoqda,- deydi MCHJ rahbari Elyorjon Nazirov. - Asosiy eʼtiborni ishlab chiqarish tarmoqlari faoliyatini kengaytirish, ish oʻrinlari sonini koʻpaytirishga qaratganmiz. Shu maqsadda hademay avtomobillar uchun rezina-texnika va temir jismlar uchun boʻyoqlar ishlab chiqarishni yoʻlga qoʻyamiz. Bu yana oʻnlab yangi ish oʻrinlari yaratishga, sifat va samaradorlikni oshirishga xizmat qiladi.