Asian Boxing ұйымы мен Өзбекстан бокс федерациясы өзара ынтымақтастықты нығайту мақсатында меморандумға қол қойды.

Атаулы құжат Ташкент қаласында жоғары деңгейде ұйымдастырылған Азия Олимпиада кеңесінің 46-бас Ассамблеясы аясында рәсімделді. Құжатқа Asian Boxing ұйымының президенті Чунхаважира мен Өзбекстан бокс федерациясының төрағасының бірінші орынбасары, Asian Boxing ұйымының вице-президенті Сәкен Полатовтың кездесуінде қол қойылды.

Кездесу барысында биылғы жылы өтетін жарыстардың күнтізбесі, қыркүйек–қазан айларында Жапонияда жоспарланған Азия ойындары, сондай-ақ халықаралық ынтымақтастықты кеңейту жолдары талқыланды.

Келіссөздер нәтижесінде екі ұйым арасында тұрақты ынтымақтастықты дамытуға бағытталған меморандум бекітілді. Аталған келісімге сәйкес, Өзбекстанның әрбір облысында бір-бірден бокс мектебі іріктеліп, оларды заманауи әрі тиімді әдістемелер негізінде дамыту, шетелдік жаттықтырушылар мен мамандарды тарту, сондай-ақ спортшылар, төрешілер мен мамандар үшін халықаралық оқу-жаттығу жиындарын жүйелі түрде ұйымдастыру жоспарланып отыр.