Спиртли ичимликни муттасил ва кўп миқдорда истеъмол қилиш инсон организмига ва унинг онгига жиддий зарар экани тўғрисида оммавий ахборот воситаларида бот-бот ёзилса ҳам, масжидларда имом хатиблар томонидан қайта-қайта қораланса ҳам, шифокор ва ҳуқуқ-тартибот идоралари ходимлари ичкиликнинг зарарли оқибатларини мунтазам айтиб турсалар ҳам ароққа ружу қўйган кимсалар бу иллатдан воз кечишни хаёлларига ҳам келтирмайди.

Мушукдек, елка қисиб юрган киши, шиша ичида сокингина турган шайтоннинг “пешоби”ни меъёридан ошириб ичиб олгач, у мушукчадан шерга айланади. Ким ва кимларга нима деяётганини ўзи англаб-англамай, аввал ҳақоратлашишга, кейин муштлашув ва ҳатто пичоқбозликкача олиб боради. Охир оқибат мастликнинг касри фожеа билан якун топади.
Жиззах вилояти Ғаллаорол тумани “Мулкуш” маҳалла фуқаролар йиғинида яшовчи икки ҳамқишлоқ ароқ ичиб дўконда айнан спиртли ичимликлар борасида гап талашиб қолади ва спиртли ичимлик таъсирида ёқалашиб кетади. Атрофдагилар уларни ажратиб қўйишади. 
Аммо спиртли ичимлик ичишни давом этирган, “Мулкуш” МФЙликлардан бири Майқул Мастбоевга ҳамқишлоғининг кўпчиликни орасида айтган гаплари ўта жиддий ҳақоратдек туюлиб, унинг спиртли ичимлик таъсирига ўтиб бўлган онгига салбий таъсир қилади ва ҳамқишлоғи Насбой Зўрқулов билан орани очиқ қилиб олиш мақсадида унинг фермерлик даласига атайлаб жанжаллашиш учун маст ҳолда излаб боради... 
Жиззах вилояти ички ишлар бошқармаси Ахборот хизмати хабар беришича, ғаллаороллик фуқаро ҳамқишлоғининг олдига маст ҳолатда муштлашиш учун борган ва қаттиқ калтакланиши оқибатида вафот этган. 
Хабарда айтилишича, Ғаллаорол тумани “Мулкуш” МФЙда яшовчи, 1986 йилда туғилган фуқаро Майқул Мастбоев ҳамқишлоғи Насбой Зўрқулов билан орани очиқ қилиш мақсадида унинг фермер хўжалиги даласига борган. Шу ерда бир қишлоқда яшовчи 2 фуқаро муштлашиб, оқибатда Майқул жиддий тан жароҳатлари олган ва кучли зарбалар таъсирида ҳушини йўқотган. Шундан сўнг фермер Насбой уни даладан уйига олиб борган ва Майқулнинг турмуш ўртоғига топширган. Кўп ўтмай, муштлашув оқибатида олган оғир тан жароҳатлари натижасида Майқул Мастбоев ҳушуга келмай жон таслим этган.
Вафот этган Майқул Мастбоевнинг жасади суд тиббий экспертизадан ўтказилган ва унинг хулосаларига кўра, фуқаронинг ўлимига бош мия тўқималарига қон қуйилиши, чап томон иккинчи ва ўн биринчи, ўнг томон олтинчи ҳамда ўн биринчи қовурғалар синиши, чап буйрак ва талоқ ёрилиши сабаб бўлганлиги қайд этилган.
Суриштирувларда аниқланишича, икки ҳамқишлоқнинг жанжалига жорий йил 15 апрель куни, муборак Рамазон ойи бўлишига қарамай дўконда спиртли ичимликлар борасида ширакайф ҳолда гап талашиб, далада муштлашгани оқибатида юз берганлиги таъкидланмоқда. 
Айни вақтда, Майқул Мастбоевнинг ўлимига сабабчи бўлган фермер Насбой Зўрқулов тегишли тартибда хибсга олинган. 
Спиртли ичимлик оқибатида бир оила боқувчисидан айрилди, болалари етим қолди. Иккинчисининг эса бинойидек бошқариб турган фермерлиги бошсиз қолди, ўзи қасддан танага ҳаёт учун хавфли бўлган оғир тан жароҳати етказиш ва қасддан одам ўлдиришда гумон қилиниб қамоққа олинди ва айби исботланса, бир неча йилларга қамалиб кетиши шубҳасиз.
Ароқнинг касофати – бир жоннинг талофати, деб шунга айтишса керакда. 

А.ҚАЮМОВ, ЎзА