Жиззах вилояти Арнасой туманида хитойлик инвесторлар томонидан барпо этилаётган янги завод қурилишига старт берилди.

Давлатимиз раҳбарининг 2019 йил 29 апрелдаги “Республика иқтисодиётига тўғридан-тўғри хорижий инвестицияларни жалб қилиш механизмларини янада такомиллаштириш чора-тадбирлари тўғрисида” ги қарори ижросини таъминлаш борасида Арнасой туманида кенг кўламли ишлар амалга оширилмоқда. 

Мамлакатимизга хорижий инвестицияларни жалб этиш ва самарали бошқариш давлат учун иқтисодий ўсишнинг асосий драйверларидан бири ҳисобланади. Жалб этилган ушбу инвестициялар янги иш ўринлари яратишга, инфратузилмани, ишлаб чиқаришни ривожлантириш ва маҳсулот экспортини ошишига хизмат қилади.

Арнасой туманининг “Бахтли” маҳалла фуқаролар йиғинида Хитойнинг “Bashiran Co., Ltd” компанияси томонидан томчилатиб суғориш тизими учун шланг ишлаб чиқариш лойиҳасини амалга ошириш ишлари бошлаб юборилди. Мазкур инвестиция лойиҳаси учун маҳалла ҳудудидан 4,5 гектар ер майдони ажратилиб, ҳозирда қурилиш ишлари босқичма-босқич амалга оширилмоқда.

Арнасой тумани ҳокими Одил Мусанов мазкур ҳудудда бўлиб, ушбу янги завод лойиҳаси ва у ерда олиб борилаётган ишлар билан танишди. Хитой Халқ Республикасидан келган инвестор ҳамда қурувчилар билан очиқ мулоқотда бўлиб, ушбу объект барпо этилишида барча зарур ёрдамга тайёр эканини таъкидлади. 

Ушбу лойиҳа нафақат замонавий технологияларни жорий этиш, балки аҳоли бандлигини таъминлаш борасида ҳам муҳим аҳамиятга эга. Қишлоқ хўжалиги учун ниҳоятда зарур бўлган томчилатиб суғориш шлангларини ишлаб чиқариш заводи ишга туширилгач 100 нафардан зиёд маҳаллий ёшлар доимий ва даромадли иш ўринлари билан таъминланади.

<iframe width="650" height="420" src="https://www.youtube.com/embed/uqNcv5AzWoY" title="Arnasoyda yangi zavod qurilishi boshlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

А.Қаюмов, Ж.Ёрбеков (видео+сурат), ЎзА мухбирлари