Жорий йил Жиззах вилоятида 108 минг 932 гектар майдонга кузги бошоқли дон экиш режалаштирилган. Шундан 8 минг 43 гектари вилоятнинг Арнасой тумани ҳиссасига тўғри келади.

Туман ғаллакорлари шу кунга қадар қарийб 7 минг гектар майдонга ғалла экиб бўлишди. Ерга қадалган ушбу барака уруғининг 43 гектари очиқ майдонларга, 6 минг 940 гектари эса ғўза қатор ораларига жойлаштирилган.

Шунингдек, бир вақтнинг ўзида кетма-кет ғаллага сув қўйиш ишлари ҳам олиб борилиб, бир кунда 150 гектардан зиёд, мавсум бошидан бери 72 фоиз ғалла майдони суғориб бўлинди. 2 минг 62 гектар майдонга экилган ғалла униб чиққан.  

Кузги дон экиш учун туманда 48 дона экиш мосламаси жалб этилган. 647 тонна фосфорли ўғитлар жамғарилган.

– Ғалла экишдаги барча агротехник тадбирлар “Ўзагроинспекция”нинг туман бўлими томонидан назоратга олиниб, 2023 йил ҳосили учун белгиланган ғаллани вақтида экиш, ерни сифатли текислаш ва экиш билан бирга фосфорли ўғитлар бериш ишларини кўнгилдагидек ташкил этилиши бўйича 210 нафар фермер хўжаликлари раҳбарларига огоҳлантирувлар берилган, – дейди “Ўзагроинспекция” Арнасой тумани бўлими инспектори Равшан Холиқов. – Бундан ташқари, бу ишга масъул этиб белгиланган шахсларга 45 та ёзма кўрсатма берилиб, 3 та тақдимнома киритилган.

Мазкур агротехник тадбирни тез кунларда сифатли якунлаш юзасидан “Ўзагроинспекция” туман бўлими ходимлари томонидан назорат тадбирлари давом этмоқда.

А.ҚАЮМОВ, ЎзА