Oʻzbekiston Respublikasi Prezidenti huzuridagi Loyiha boshqaruvi milliy agentligi maʼlumotlariga koʻra, yangi elektron xizmat abituriyentlar va ularning qarindoshlarining OOʻYulariga hujjat topshirishni uzoq navbat kutishlarsiz, ularning vaqt va moliyaviy xarajatlarisiz amalga oshirish imkonini beradi. Bunda mamlakatning turli hududlarida yashovchi, Toshkentdagi oliy oʻquv yurtlariga kirish istagidagi abituriyentlar poytaxtga shaxsan hujjatlarni taqdim etish uchun kelishi kerak boʻlmaydi. Buning uchun test sinovlariga kirish uchun ariza berishning qulay, tez va ishonchli mexanizmi yaratiladi.

Yangi elektron xizmat hujjat topshirishning anʼanaviy usuliga nisbatan qator afzalliklarga ega. Xususan, abituriyentning shaxsiy maʼlumotlarini toʻldirish avtomat tartibda muassasalararo oʻzaro elektron harakatni tashkil etish yoʻli bilan amalga oshiriladi. Shuningdek, abituriyentga bir vaqtning oʻzida uchta oliy oʻquv yurtiga hujjat topshirish imkoni beriladi. Buning uchun Yagona interfaol davlat xizmatlari portali (YAIDXP) tegishli ikkinchi va uchinchi oliy oʻquv yurtlari va oʻquv yoʻnalishini avtomatik tartibda tavsiya qiladiki, bu oliy oʻquv yurti va oʻquv yoʻnalishini tanlashga sarflanadigan vaqtni qisqartiradi. Bundan tashqari, yoshlar test sinovlaridan oʻtish uchun joyni mustaqil ravishda tanlashi mumkin boʻladi. 

YAIDXPda interfaol xizmat koʻrsatishni yoʻlga qoʻyish tegishli taomilni boshqaruvchi meʼyoriy hujjat tasdiqlangandan soʻng amalga oshirilishi koʻzda tutilgan.

Ushbu xizmat yoʻlga qoʻyilgach, onlayn tartibda mamlakat OOʻYulariga kirishga hujjat topshirish uchun batafsil yoʻriqnoma chop etiladi.