Ҳарбий-техник ҳамкорлик самараси “COVID-19”га қарши кураш жараёнида намоён бўлди
Маълумки, коронавирус инфекцияси йўлини тўсиб, Covid-19 офатини енгиб ўтган Хитой эндиликда ушбу касалликка қарши курашда бошқа мамлакатларга амалий ёрдам кўрсатиб келмоқда.
Ўзбекистон Республикасининг Хитой Халқ Республикасидаги элчихонаси, Ўзбекистон Мудофаа саноати давлат қўмитаси ва Мудофаа вазирлиги юртимиз мудофаа саноати тизимини ривожлантириш мақсадида Хитойнинг бир қатор Мудофаа саноати компаниялари билан ҳамкорлик қилиб келмоқда.
Маълумки, коронавирус инфекцияси йўлини тўсиб, Covid-19 офатини енгиб ўтган Хитой эндиликда ушбу касалликка қарши курашда бошқа мамлакатларга амалий ёрдам кўрсатиб келмоқда.
Бу борадаги тадбирларни амалга оширишда Хитой ҳукумати билан билан бирга мамлакатнинг етакчи мудофаа саноати корпорация ва компаниялари ҳам фаол иштирок этмоқда.
Таъкидлаш жоиз, Хитойнинг айни йўналишда фаолият олиб бораётган “Норинко”, “Виэк Точмаш”, “Хайтера”, “Поли Технолоджи” сингари корхоналари бир неча йилдан буён Ўзбекистон Республикаси Мудофаа саноати мажмуасини ривожлантириш, Қуролли Кучларни замонавий қурол-аслаҳа, ҳарбий ва махсус техника воситалари билан таъминлаш, соҳани модернизациялашга ҳисса қўшиб келмоқда.
Ҳамкорлик жараёнининг узвий давоми сифатида юқорида номлари келтирилган компаниялар коронавирус инфекцияси тарқалишининг олдини олиш, ушбу касалликка қарши курашиш бўйича биргаликдаги ҳаракатларни кучайтириш ҳамда Ўзбекистон халқининг бу борадаги саъй-ҳаракатларини қўллаб-қувватлаш мақсадида Ўзбекистонга бир марталик стерилланган тиббий қўлқоплар, ҳимоя кўзойнаклари, юз учун фильтрловчи ниқоблар, тана ҳароратини ўлчовчи термометрлардан иборат инсонпарварлик ёрдамини жўнатди.
Мазкур инсонпарварлик юки мамлакатимизнинг Хитойдаги элчихонаси, Мудофаа саноати бўйича давлат қўмитаси ва Мудофаа вазирлиги мутасадди вакиллари ҳамкорлигида жорий йилнинг 29 март куни Мудофаа вазирлигининг махсус ҳаво лайнерида Ислом Каримов номидаги “Тошкент” Халқаро аэропортига олиб келинди.
Дўст Хитой халқининг инсонпарварлик ёрдами аэропорт ҳудудида тегишли вазирлик ва идоралар масъул шахслари томонидан қабул қилиб олинди.
Ушбу тиббиёт буюмлари республикамиз ҳудудида карантин режимини таъминлашга жалб қилинган ҳарбий хизматчилар, ички ишлар, тиббиёт ходимлари ва бошқа муҳтож шахсларга тарқатилиши режалаштирилган.
Ўзбекистон Хитой ҳукуматининг беминнат инсонпарварлик ёрдамини чуқур ҳис этиб, юксак қадрлайди.
Эслатиб ўтиш ўринли, Ўзбекистон ҳам коронавирус ўчоғи ҳисобланган Хитойнинг Хубэй провинциясидаги Ухань шаҳрига икки марта — 12 февраль ва 3 март кунлари энг зарур тиббий буюмлардан иборат гуманитар кўмак юкини жўнатган эди.