Шу кунларда Саудия Арабистони пойтахти Ар-Риёд шаҳрида шарқий, жанубий ва Марказий Осиё мамлакатлари учун ўтказилаётган Олимпия бирдамлиги ҳамда Осиё Олимпия кенгашининг минтақавий форумида Ўзбекистон Миллий олимпия қўмитаси мутахассислари ҳам иштирок этмоқда.

Мазкур тадбирлар доирасида мамлакатимиз спорт мутахассислари бир қатор хорижлик олимпия ҳаракати вакиллари билан ҳамкорлик алоқаларини мустаҳкамлаш хусусида фикр алмашди.  

“Тошкент-2025” ўйинларига тайёргарлик жараёнлари борасида ҳамкорларга сўзлаб берилди.  

Халқаро олимпия қўмитаси, Осиё олимпия кенгаши мутасаддилари, минтақадаги Миллий олимпия қўмитаси вакиллари қатнашаётган форумда келаси йил Осиё қитъасида ўтадиган комплекс мусобақаларга тайёргарлик, ҳар бир мусобақа ташкилий қўмитаси томонидан белгиланаётган талаблар хусусида тўхталиб ўтилди.  

Хусусан, 2023 йил 23 сентябрь – 8 октябрь кунлари Хитойнинг Ханчжоу шаҳрида XIX ёзги Осиё ўйинлари, 17-26 ноябрь кунлари Таиланднинг Бангкок ҳамда Чонбури шаҳарларида ўтадиган Жанг санъати ва ёпиқ иншоотлардаги Осиё ўйинларнинг ташкилий қўмитаси вакиллари мусобақалар ҳақидаги янги маълумотлар, регламентдаги ўзгаришлар бўйича ахборот тақдим этди.  

Форумда онлайн тарзда қатнашган “Париж-2024” XXXIII ёзги Олимпия ўйинлари ташкилий қўмитаси вакиллари ҳар бир делегация учун қўйилаётган талаблар мажмуасини тақдим қилди.  

Т.Рўзиев,  

ЎзА