Pentagon shu yil yozda «Ronald Reygan» aviatashuvchi kemasini Yaqin Sharqqa ko‘chirishni rejalashtirmoqda. Ushbu amaliyotdan ko‘zlangan maqsad Afg‘onistondan olib chiqilayotgan AQSH qo‘shinlarini qo‘llab-quvvatlashdan iborat, deb yozadi Wall Street Journal gazetasi mamlakat mudofaa vazirligi manbalariga tayangan holda.

Pentagon rejasiga ko‘ra, «Ronald Reygan» kemasi hozir Yaponiyaning Yokosuke portida turibdi. U Yaqin Sharq mintaqasiga yozda jo‘naydi va u yerda to‘rt oy davomida navbatchilik qiladi.

«Boshqa bir aviatashuvchi  «Duayt Eyzenxauer» hozir mazkur mintaqada turibdi. U o‘tgan uch yil davomida ikki marta mazkur mintaqaga joylashtirilgan edi», - deyiladi gazeta tarqatgan xabarda.

AQSH ma’muriyati 1 maydan 11 sentyabrgacha qo‘shinlarini Afg‘onistondan olib chiqishni yakunlashi haqida xabar qilgan edi.