АҚШ Венесуэлага қарши йирик ҳарбий операция ўтказгани ва президент Николас Мадуро ҳамда унинг рафиқаси қўлга олиниб, мамлакатдан олиб чиқиб кетилгани ҳақида хабарлар тарқалди. Бу ҳақда АҚШ президенти Дональд Трамп ўз ижтимоий тармоғида маълум қилди.

Маълумотларга кўра, шанбага ўтар кечаси АҚШ қуролли кучлари Венесуэла пойтахти Каракасга ҳаво ҳужумлари уюштирган. Шаҳарда бир неча портлашлар содир бўлган, ҳарбий самолётлар ва вертолётлар ҳаракатланган. Айрим ҳудудлар электр таъминотидан узилган.

Венесуэла ҳокимияти бу ҳаракатларни АҚШ томонидан қилинган ҳарбий тажовуз деб баҳолаб, мамлакатда фавқулодда ҳолат эълон қилди. Ижтимоий тармоқларда тарқалган маълумотларга кўра, АҚШ ҳарбийлари Каракасдаги бир қатор ҳарбий объектларга, жумладан Ла-Карлота аэродроми ва Фуэрте-Тиуна ҳарбий базасига зарбалар берган. Ҳужумлар мамлакатнинг бошқа ҳудудларида - Миранда, Арагуа ва Ла-Гуайра штатларида ҳам қайд этилгани айтилмоқда.

Венесуэла расмийлари АҚШни фуқаролик ва ҳарбий объектларга ҳужум қилганликда айблади. Уларга кўра, бу амалиётнинг асосий мақсади мамлакатдаги ҳукуматни алмаштириш ва Венесуэланинг катта нефть ҳамда табиий ресурсларига эгалик қилишдир.

Николас Мадуро аввалроқ АҚШ бир неча ойдан бери Венесуэлага сиёсий ва ҳарбий босим ўтказиб келаётганини, бу жараён Кариб денгизида АҚШ ҳарбий кучларининг жойлаштирилиши билан бошланганини айтган эди.

Венесуэла ҳукумати ўз баёнотида АҚШ ҳаракатларини қатъий қоралаб, мамлакатнинг ижтимоий ва сиёсий кучларини сафарбарликка чақирди. Томонлардан қўшимча баёнотлар ва аниқ тафсилотлар кутилаётгани билдирилмоқда.

Кенжа Бекжонов, ЎзА