Икки кун олдин Қўшма Штатларнинг Украинадаги Фавқулодда ва мухтор элчиси Брижит Бринк лавозимини тарк этди.

Бу воқеага Президент Владимир Зеленский идораси томонидан дипломатга босим қилингани ва Вашингтон етакчиси Дональд Трамп билан ишлаш осон кечмаётгани сабаб қилиб кўрсатилмоқда. Шу билан бирга Бринк қарийб уч йил давомида уруш ҳудудида, оиласидан узоқда яшади.

Давлат департаменти матбуот котиби дипломатга ҳурмат изҳор қиларкан, ҳолатни ғайри оддий якун сифатида баҳолади. Маълумки, Трамп президентликка сайлангач, АҚШ сиёсати Украинадан узоқлашиб, Россияга нисбатан кескин қайта йўналтира бошлагани сир эмас. Бошқача айтганда Вашингтоннинг Киев билан муносабатида сезиларли ўзгариш кузатилмоқда. Элчи томонидан қабул қилинган кутилмаган қарор айни вазият билан боғлиқ бўлиши ҳам мумкин.

Бринк ҳақида ижобий фикр билдирган собиқ украиналик амалдор СNN телеканалига айтишича, элчи янги маъмурият даврида силлиқ ишлай олмаслигини ҳис қилган.

– Элчи уч йил давомида Украинани тизимли равишда қўллаб-қувватлади, – деган манба. – Киев муваффақият қозониши учун ваколати доирасида ҳамма ишни қилди. Унинг ҳаётий принциплари бошқача фаолият юритишга йўл қўймасди.

Киевда 2022 йил май ойида иш бошлаган Бринк Байден маъмуриятининг Украинага ҳарбий ва гуманитар ёрдам бериш сиёсатини илгари сурган.

Мусулмон Зиё, ЎзА