Қўшма Штатлар Сенати Россияга қарши янги санкциялар тўғрисидаги қонун лойиҳасини АҚШ президенти Дональд Трамп ва РФ етакчиси Владимир Путиннинг Будапештдаги учрашувидан олдин муҳокама қилмайдиган бўлди. Бу ҳақда “Bloomberg” ахборот агентлиги ёзиб чиқди.

Нашр республикачилар раҳбари Жон Туннинг сўзларига таяниб, ҳозирча Сенат вақтинча танаффусга чиқаётганини маълум қилди. 

Янги қонун лойиҳасига кўра, Россиянинг энергетик маҳсулотларини харид қиладиган ва Украинага фаол ёрдам кўрсатмаётган мамлакатларга нисбатан АҚШ ўзининг импорт божларини 500% гача ошириш ҳуқуқига эга бўлади. Бу чекловлар Хитой ва Ҳиндистон каби давлатларга ҳам тааллуқли бўлиши мумкин.

Ўтган ҳафта Жон Тун Сенат ушбу қонун лойиҳасини 30 кун ичида овозга қўйишни режалаштираётганини таъкидлаганди. Ҳужжатни 100 сенатордан камида 85 нафари қўллаб-қувватлаётган бўлса-да, аммо у бир неча ойдан бери кўриб чиқиш жараёнида тўхтаб қолган. 

– Россияга қарши санкциялар борасида муҳокамалар тўхтагани йўқ, чунки ушбу ўлка Украинага қарши ҳужумларини Аляскадаги президентлар саммитидан кейин ҳам давом эттирмоқда, - деган АҚШ молия вазири Скотт Бессент.

Трамп ҳам бир неча бор Россия тинчликка рози бўлмаса, унга қарши санкциялар жорий этиш билан таҳдид қилганэди. Шу билан бирга, у Европа етакчиларини Россия нефтини сотиб олиб, Украинадаги зиддиятни “молиялаштираётганликда” айблаган эди. 

Хуллас, РФ қарши санкциялар масаласи ва  ёндашувлар АҚШ ва Россия етакчиларининг Будапештдаги учрашувидан кейин маълум бўлади.

<iframe width="650" height="420" src="https://www.youtube.com/embed/6XxAxeaDtRw" title="AQSHning Rossiyaga qarshi yangi sanksiyalari kechiktirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА