АҚШ молия вазири Скотт Бесцент “Fox News” телеканалига берган интервьюсида Президент Дональд Трамп ва мудофаа вазири Пит Хегсет кўрсатмасига биноан, Эрон яқинида қўшимча ҳарбий куч жойлаштирилаётганини маълум қилди. Вазир таъкидлашича, Америка томони давом этаётган музокарадан олдинлаб кетишни истамайди, аммо маъмурият “ресурсларни жойлаштириш вариантларини кўриб чиқмоқда”.
“The Wall Street Journal” нашри АҚШ расмийларига таяниб хабар беришича, Пентагон Яқин Шарққа жўнатиш учун иккинчи зарба берувчи гуруҳ тузишга буйруқ берган. “USS George H.W. Bush” авиаташувчиси аллақачон минтақага етиб борган “USS Abraham Lincoln”га қўшилади. Бир расмий аниқлик киритишича, янги авиаташувчи икки ҳафта ичида Америка шарқий қирғоғидан йўлга тушиши мумкин.
“РИА Новости” кеча Эрон чегараси яқинида АҚШ денгиз флотининг “Boeing P-8A Poseidon” сув ости кемасига қарши разведка самолёти ва “Northrop Grumman” компаниясида ишлаб чиқарилган “MQ-4C Triton” учувчисиз учоғи парвози кузатилгани ҳақида хабар берди.
Самолёт Баҳрайндан учиб, Ҳормуз бўғози устидан айланиб ўтган ва Бирлашган Араб Амирликлари Абу-Даби ва Ўмон кўрфази узра ҳам кўринган.
Январь ойи охирида Президент Дональд Трамп Эронга Венесуэла қирғоғи яқинидагига қараганда кўпроқ кемалар юборилишини айтди. Унинг сўзларига кўра, Теҳрон ядровий битим тузишни хоҳлайди ва бу муддатни фақат ўзлари билишади.
“The New York Times” ёзишича, Вашингтон Ислом Республикаси ядровий дастурни қисқартириш учун қўшимча чоралар кўриши, жумладан уран бойитилишини тўлиқ тўхтатиши ва баллистик ракета ишлаб чиқаришни чеклашини кутмоқда. Эрон расмийлари эса тенглик ва ўзаро ҳурмат тамойилига асосланган ядровий мулоқотни қайта бошлашга чақирмоқда.
Таъкидланаётганидек, агар музокара муваффақиятсиз якунланса, Қўшма Штатлар ядро ва ракета иншоотларига зарба бериш, мамлакат раҳбариятини заифлаштириш амалиётини бошлаш, Америка кучлари томонидан махсус рейдлар уюштириши мумкин. Фақат газета манбалари Трамп томонидан ҳали амалиётга рухсат берилмагани ва таклиф қилинган вариантлар орасидан якуний танлов қилинмаганига аниқлик киритган.
Ўз навбатида Теҳрон ҳам Қўшма Штатларнинг ҳар қандай, ҳатто чекланган ҳужумига ҳам жавоб беришга тайёрлигини билдирди.
– Эрон ракеталари минтақадаги Америка базаларига етиб бора олади, – дейилган хабарда.
Шунга қарамай, ташқи ишлар вазири Аббос Арағчий Қўшма Штатлар билан ядровий келишув бўйича мулоқотда Ислом Республикаси учун қониқарли натижага умид билдирди.
– Тинчлик ва осойишталик даври келишига чин дилдан умид қиламан, мулоқот урушдан устун, – деб ёзган у ижтимоий тармоқ саҳифасида Эрон халқини Ислом инқилоби 47 йиллиги билан табрикларкан. – Биз дипломатияга устувор аҳамият берамиз. Биз тинч ядровий дастур бўйича келишувга эриша оламиз. Қачонки, адолатли, мувозанатли бўлса...
Арағчий мамлакат “ҳар қандай вазиятда” ўз суверенитетини ҳимоя қилиш йўлидан ортга чекинмаслигини қўшимча қилган.
АҚШ ва Эрон делегациялари ўртасида билвосита музокара 6 февраль куни Ўмон пойтахти Маскатда бўлиб ўтди. Трамп мулоқот кўнгилдагидек ўтгани ва албатта давом этишини таъкидлади. Шу билан бирга Ислом Республикаси ташқи сиёсат идораси раҳбари мабодо урушга олиб келган тақдирда ҳам, Эрон уранни бойитиш ҳуқуқини талаб қилишига урғу берди.
С.Раҳимов, ЎзА