Бу – Ўзбекистон миллий метрология институтига шу кунларда чет элдан келтирилган навбатдаги эталондир.

Давлат раҳбари қарори билан тасдиқланган дастурга мувофиқ Ўзбекистон миллий метрология институтига навбатдаги АҚШнинг “Fluke Corporation” корхонаси томонидан яратилган ўлчаш кўлами 0,01 дан 1100 °C гача бўлган юқори аниқлиқдаги бирламчи ҳарорат (Кельвин) эталони келтирилди.

Ўзбекистон миллий метрология институти хабарига кўра, эталон ёрдамида хорижий давлатларнинг метрология институтлари билан солиштириш ишлари амалга оширилади ҳамда мамлакатимизда расмийлаштирилган сертификатларни халқаро даражада тан олишга эришилади.

Ушбу эталон ҳам аниқлиги ва метрологик хусусиятларига кўра Марказий Осиё давлатлари ичида ягона ҳисобланади.

Унинг таркиби – сувнинг уч нуқтаси (0,01 °C), қотиш нуқтаси индий (156,5965 °C), қалай (олова) (231,928 °C), цинк (419,527 °C), алюминий (660,323 °C) ва ҳарорат ҳосил қилувчи қурилмалардан ташкил топган.

Хорижий мутахассислар томонидан режага асосан бир ой давомида ўрнатиш ишлари муваффақиятли якунланганидан кейин эталон тўлақонли ишга туширилади.

Эталон – нефть ва газ, энергетика, енгил саноат, фармацевтика, иссиқлик энергетикаси, кимё, озиқ-овқат саноати тармоқларида кенг миқёсида фойдаланиладиган юқори аниқликдаги ўлчашларни таъминлайди.

Азамат Тўраев,

Ўзбекистон миллий метрология

институти Матбуот хизмати бошлиғи