Шу кунларда “Ўзархив” агентлиги вакиллари АҚШнинг Солт-Лейк-Сити шаҳрида бўлиб ўтаётган "RootsTech 2026" халқаро шажара конференциясида иштирок этмоқда.

Мазкур конференция генеалогия, оилавий тарихни ўрганиш ҳамда архив ҳужжатларини рақамлаштириш соҳасидаги дунёдаги энг йирик халқаро тадбирлардан бири ҳисобланади.

Конференция халқаро генеалогия ташкилоти томонидан ташкил этилган бўлиб, унда турли мамлакатлардан архив соҳаси мутахассислари, илмий муассасалар вакиллари, генеалоглар ҳамда ахборот технологиялари соҳасидаги экспертлар иштирок этмоқда.

Тадбир доирасида архив ҳужжатларини рақамлаштириш, генеалогик маълумотларни сақлаш ва улардан фойдаланиш, тарихий ҳужжатларни индексация қилиш, архив соҳасида сунъий интеллект ва замонавий ахборот технологияларини қўллаш масалалари муҳокама қилинмоқда.

Шунингдек, иштирокчилар тарихий ҳужжатларни сақлаш, уларнинг рақамли шаклда кенг жамоатчилик учун очиқлигини таъминлаш ҳамда архив соҳасидаги илғор халқаро тажрибалар билан танишмоқда.  

“Ўзархив” агентлиги вакилларининг ушбу халқаро конференцияда иштирок этиши архив ишини ривожлантириш, архив ҳужжатларини рақамлаштириш жараёнларини такомиллаштириш ҳамда халқаро ҳамкорликни кенгайтиришга хизмат қилади.  

Гулноза Бобоева, ЎзА