23 июндан 24 июнга ўтар кечаси АҚШнинг Майами шаҳри яқинидаги Сарфсайд шаҳарчасида кўп қаватли турар-жой қулаб тушганди. Вайрона остида қолиб кетган 150 кишининг тақдири халиям номаълумлигича қолмоқда.

 Ҳозиргача 12 киши ҳалок бўлгани маълум,  35 киши қутқариб олинган. Ҳукумат одамларнинг бир қисми ҳали ҳам ҳаёт эканига умид қилмоқда. Улар ўргатилган итлар, сонара, дронлар ва инфрақизил сканерлар воситасида қидирилмоқда, деб хабар қилади  BBC News.

Бедарак йўқолганлар орасида Парагвай президентининг қайнсинглиси ҳам борлиги айтилмоқда.

Фожиа тахминан, маҳаллий вақт билан  соат 01:30 содир бўлган. Бино қулагандан кейин ёнғин бошланган.

Champlain Towers South номи берилган ушбу 12 қаватли темир-бетондан қурилган турар-жой 136 та хонадондан иборат бўлиб, у 1981 йили фойдаланишга топширилган.