Қўшма Штатларда кузатилган кучли қишки бўрон оқибатида 1 миллиондан ортиқ уй хўжалиги электр таъминотисиз қолди, юзлаб авиақатновлар бекор қилинди, деб хабар бермоқда “DW” нашри.

Таъкидланишича, қор, ёмғир ва кескин совуқ билан кечаётган бўрон Техасдан тортиб Шимолий Каролинагача бўлган ҳудудларга таъсир кўрсатган. Шунингдек, Вашингтон ва Нью-Йорк каби йирик шаҳарлар ҳам жиддий қийинчиликларга дуч келмоқда. Айни пайтда ўлканинг камида 20 штатида фавқулодда ҳолат режими жорий этилган.

АҚШ Миллий метеорология хизмати маълумотига кўра, ноқулай об-ҳаво келаси ҳафтанинг ўрталаригача сақланиб қолиши мумкин.

Нью-Йорк шаҳри мэрининг маълум қилишича, шаҳарда камида 5 киши кўчада музлаб вафот этган ҳолда топилган. Расмий сабаблар аниқланмоқда, бироқ маҳаллий ҳокимият экстремал совуқ уйсизлар учун катта хавф туғдиришини таъкидлаган. Луизиана штатида эса икки киши совуқ оқибатида ҳалок бўлгани хабар қилинган. 

“PowerOutage” мониторинг хизмати якшанба куни кечқурун мамлакатда 1 миллиондан ортиқ хонадон электрсиз қолганлигини қайд этди. Энг кўп узилишлар Теннесси (330 мингдан зиёд), Миссисипи (170 минг), Луизиана (140 минг) ва Техас (90 мингдан ортиқ) штатларида кузатилган.

АҚШ ички хавфсизлик вазири Кристи Ноэм бўронни “тарихий кўламдаги” деб атаб, аҳолини эҳтиёткорликка чақирди. Президент Дональд Трамп эса фуқароларга уйда қолиш ва иссиқ кийинишни тавсия қилган.

Экологлар фикрича, бу каби экстремал об-ҳаво ҳодисалари қутбий гирдобнинг ўзгариши натижасида арктик ҳавонинг жанубга сурилиши билан боғлиқ бўлиши мумкин. Олимлар эса бундай ҳолатлар сонининг ортиши иқлим ўзгариши билан узвий боғлиқлигини айтмоқда.

Д.Ҳакимов, ЎзА