АҚШ вице-президенти Жей Ди Вэнс тарихий тинчлик келишувидан сўнг янги савдо йўлагини илгари суриш мақсадида Арманистон ва Озарбайжонга ташриф буюрмоқда, деб хабар берди Euronews.

Душанба куни Вэнс Арманистонга келиб, Озарбайжон билан тинчлик жараёнини янада мустаҳкамлаш масалаларини муҳокама қилди. Ереванда Арманистон бош вазири Никол Пашинян билан музокара ўтказди, сешанба куни эса Озарбайжон пойтахти Бакуга йўл олди.  

Вашингтон Жанубий Кавказ қиёфасини ўзгартириши мумкин бўлган савдо йўлагини ишга туширишга интиляпти.

“Биз фақат Арманистон учун тинчлик ўрнатмаяпмиз. Биз Арманистон ва АҚШ учун биргаликда ҳақиқий фаровонлик яратяпмиз”, - деди Вэнс Пашинян билан қўшма матбуот анжуманида.

Вице-президент ва Арманистон етакчиси энергетика бўйича келишувни имзолади. Пашиняннинг айтишича, бу ҳужжат “Арманистон ва АҚШ ўртасидаги энергетика ҳамкорлигида янги босқични очиб беради”.

Вэнс, шунингдек, Арманистонга 11 миллион доллар қийматидаги америкада ишлаб чиқарилган учувчисиз технологиялар сотилиши ҳақида маълум қилди. Пашинян бу ташрифни “чиндан ҳам тарихий” деб атади ва АҚШ президенти Дональд Трамп Арманистон - Озарбайжон тинчлик жараёнидаги воситачилиги учун Нобель тинчлик мукофотига сазовор бўлишига катта умид билдиришини айтди.  

“Трампнинг халқаро тинчлик ва фаровонлик йўли” лойиҳаси Арманистон жануби орқали ўтувчи 43 километрли йўлак бўлиб, у Озарбайжонни Нахичевон эксклави билан боғлайди. АҚШ Давлат департаментига кўра, янги савдо йўлаги лойиҳаси америка сармояларини жалб қилиши ва стратегик аҳамиятга эга минераллар ҳамда ноёб элементларни АҚШ бозорига етказиб бериш имконини яратиши керак.

2025 йил август ойида Оқ уйда ўтган саммитда Трамп икки давлат ўртасидаги келишувга воситачилик қилди. Унга кўра, Арманистон ва Озарбайжон бир-бирининг ҳудудига даъво қилмаслик ва куч ишлатмаслик мажбуриятини олган. Жанубий Кавказда Россиянинг яқин иттифоқчиси ҳисобланган Арманистон Москва етакчилигидаги Коллектив хавфсизлик шартномаси ташкилотидаги иштирокини музлатди ва АҚШ ҳамда Европа Иттифоқи билан алоқаларни чуқурлаштиришга киришди.

<iframe width="650" height="420" src="https://www.youtube.com/embed/CqTVLid2zyw" title="AQSH vitse-prezidenti Armaniston va Ozarbayjonga tashrif buyurdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА