АҚШ ва Венесуэла дипломатик ҳамда консуллик муносабатларини қайта тиклашга келишиб олди. Бу қарор Вашингтон томонидан Президент Николас Мадуро қўлга олингач, икки давлат муносабатида янги босқич бошланганини англатади.

Маълум қилинишича, АҚШ ҳарбийлари январь ойида ўтказилган кутилмаган амалиёт давомида Мадуро ва унинг рафиқасини қўлга олиб, Нью-Йоркдаги судга олиб кетган. Уларга қурол савдоси ва гиёҳванд моддалар билан боғлиқ жиноятларда иштирок этганлик айблови қўйилган. Мадуро бу айбловларни рад этмоқда.

Ҳозирги қўшма баёнотга кўра, янги дипломатик алоқалар барқарорликни мустаҳкамлаш, иқтисодий тикланишни қўллаб-қувватлаш ва сиёсий ярашув жараёнини рағбатлантиришга қаратилган. Венесуэла ҳукумати бу жараён “ўзаро ҳурматга асосланган янги мулоқот босқичи” бўлишини билдирди.

Каракасдаги АҚШ элчихонаси қайта очилиб, янги дипломат тайинланган. Шунингдек, дипломатик ходимларнинг бир қисми Колумбия пойтахти Боготадаги элчихонадан Венесуэлага кўчирилиши кутиляпти.

Пентагон расмийлари Венесуэладаги сиёсий жараённи босқичма-босқич ислоҳотлар орқали демократик сайловга олиб боришга қаратилганини таъкидламоқда. Шу билан бирга икки давлат нефть ва кончилик соҳаларида ҳамкорликни кенгайтириш имкониятини ҳам муҳокама қилмоқда.

Мусулмон Зиё, ЎзА