АҚШ ва Хитойнинг юқори мартабали дипломатлари Украина ва Россия ўртасидаги кескинлик кучайиб бораётганини муҳокама қилиб, беқарор вазиятни юмшатиш учун чоралар кўриш зарурлигини таъкидладилар.

АҚШ давлат котиби Энтони Блинкен Хитой давлат маслаҳатчиси ва ташқи ишлар вазири Ван И билан суҳбатда “Россиянинг Украинага нисбатан тажовузи глобал хавфсизлик ва иқтисодиётга хавф туғдириши мумкинлигини таъкидлади”, — дейилади АҚШ давлат департаменти баёнотида.

Хитой ташқи ишлар вазирлигига кўра, Ван И Блинкенга “совуқ уруш тушунчаси”дан воз кечиш кераклигини айтган.
- Украина муаммосини ҳал қилиш учун “Минск келишуви”нинг бошланғич нуқтасига қайтиш керак ... бу барча томонлар томонидан тан олинган сиёсий ҳужжат ва уни ижобий амалга ошириш зарур, —-дейди Ван И.
У барча томонларни хотиржамликка, кескинликни кучайтирадиган ҳамда инқирозни юзага келтирадиган ҳаракатлардан тийилишга чақирди.
-  Бир давлат хавфсизлигини бошқа давлат хавфсизлиги ҳисобига таъминлаб бўлмайди, минтақавий хавфсизликни эса ҳарбий блокларни кучайтириш ёки кенгайтириш йўли билан мустаҳкамлаб бўлмайди, - деди Ван.

Хитой расмийси Блинкенни музокаралар орқали самарали ва барқарор Европа хавфсизлик механизмини шакллантиришга чақирди.
Унинг таъкидлашича, етакчилар ўртасида эришилган муҳим консенсусни амалга ошириш ҳар икки томон учун ҳам энг муҳим вазифадир.

Бироқ, дунё АҚШнинг Хитойга нисбатан сиёсати ўзгармаганини ва президент Байденнинг сўзлари амалда қўлланилмаганини кўриб турибди.
Қўшма Штатлар Хитой билан боғлиқ хатти-ҳаракатларда хато қилишда давом этмоқда, бу эса икки давлат ўртасидаги муносабатларни ёмонлашувига олиб келмоқда.
- Ҳозирги кундаги энг муҳим вазифа – АҚШ Пекин қишки Олимпиада ўйинларига аралашишни тўхтатиши, Тайван масаласида ўт билан ўйнашни бас қилиши ва Хитойга қарши турли кичик доиралар яратмаслиги керак, - дейди Ван Блинкенга.