Афғонистон пойтахти Кобул аэропортида америкалик муҳандис Марк Фрерихс “Толибон” ҳаракатининг юқори мартабали аъзоси Башир Нурзайга алмаштирилди. Бу ҳақда “Apnews” хабар берди.

Айирбошлаш ҳақидаги маълумот АҚШ Президенти маъмурияти томонидан тасдиқланган. 

10 йилдан ортиқ вақт давомида консалтинг муҳандиси бўлиб ишлаган ва Афғонистонга тез-тез саёҳат қилган Қўшма Штатлар Ҳарбий-денгиз кучлари фахрийси 2020 йилнинг февраль ойида ушбу мамлакатда ғойиб бўлган эди.  

У Толибонга алоқадор Ҳаққоний тармоғи томонидан ўғирлаб кетилгани тахмин қилинмоқда. Вашингтон бир неча марта Фрерихснинг озод этилишини, жумладан, 2021 йил августида Афғонистонда Толибон ҳокимиятни қўлга киритиши ва АҚШ ўз қўшинларининг асосий қисмини мамлакатдан олиб чиқиб кетганидан кейин ҳам талаб қилди.  

2022 йил апрель ойида америкалик асирнинг ёрдам сўраб қилган мурожаати эълон қилинганди. 

Фрерихс 2001 йилда АҚШнинг агентлиги ёлланган Башир Нурзайга алмаштирилган. Нурзай 2005 йилда АҚШга 50 миллион долларлик героин олиб киришга урингани учун ҳибсга олинган эди. 2009 йилда у умрбод қамоқ жазосига ҳукм қилинганди.  

Нурзай озодликка чиқиб, Афғонистонга қайтгач, Гуантанамодаги Америка қамоқхонасида 17,5 йил ўтганини ва у ерда Толибоннинг сўнгги асири эканлигини айтди.