АҚШ ҳарбийлари Тинч океанида гиёҳванд модда ташиётгани гумон қилинган кемага зарба берди. Натижада уч киши ҳаётдан кўз юмди.

– Бу икки кун ичида амалга оширилган иккинчи ҳаво ҳужуми, – дея баёнот берди мудофаа вазири Пит Хегсет. – Сўнгги бир ой 9 та шубҳали кема нишонга олинди. Аввалги зарбалар Кариб денгизи томон йўналтирилганди, бу гал “жанг майдони” Тинч океанига кўчди. Улар шунчаки контрабандачи эмас, балки наркотик террорчилар ва шаҳарларимизга ўлим олиб келишмоқда. Энди уруш ҳар куни давом этади.

Мамлакат мудофаа вазирлиги эълон қилган видео лавҳада бомба теккан кема ёниб кетгани, такрорий зарба сувдаги қолдиқни ҳам портлатгани акс этган. Президент Дональд Трамп эса АҚШ халқаро сув ҳудудида зарба бериш учун тўлиқ ҳуқуққа эгалигини даъво қилмоқда.

– Агар бу амалиёт қуруқликка кўчса, албатта Конгресс билан масалаҳатлашамиз, – деди у Оқ уйда журналистлар билан суҳбат чоғи. – Қўшма Штатлар “аксил-нарко” операция кўламини кенгайтиришга тўлиқ тайёр.

Дарҳақиқат, АҚШ ва Колумбия ўртасидаги таранглик кучаймоқда. Трамп Колумбия Президенти Густаво Петрони “гиёҳвандлик етакчиси” деб атаб, унга қарши “кескин чоралар” билан таҳдид қилди.

Мутахассислар фикрича, Колумбия ва Эквадорнинг Тинч океани бўйидаги ҳудудлари кокаиннинг АҚШга кириб келишидаги асосий йўналиш бўлиб қолмоқда.

Ҳозирча ҳужум туфайли ҳалок бўлганларнинг шахси ёки уларга тегишли бўлган наркотармоқ ҳақида маълумот берилмади.

Мусулмон Зиё, ЎзА