"TikTok" АҚШда фаолиятини давом эттириш имконини берадиган муҳим келишувга эришилганини эълон қилди. Битим Вашингтон ва Пекин ўртасида бир неча йилдан буён давом этиб келаётган қарама-қаршиликка якун ясади.

Маълумки, Дональд Трамп президентлиги биринчи даврида бошланган бу тортишув жараёнида миллий хавфсизлик билан боғлиқ хавотир сабаб "TikTok"ни АҚШда тақиқлашга уриниб кўрилган, бироқ режа амалга ошмаган.

Аввалига, тармоқнинг хитойлик эгаси — "ByteDance" компанияси АҚШдаги фаолиятини америкалик инвесторлар қўлига топширмаса, илова 2025 йил январь ойида тақиқланиши белгиланган эди. Негадир, Трамп бу қонун ижросини бир неча бор кечиктирди.

"TikTok"нинг фойдаланувчиларга контент тавсия қилувчи кучли алгоритми келишмовчиликнинг асосий сабаби сифатида эътироф этилган. Энди ушбу алгоритм америкаликлар томонидан лицензия асосида бошқарилади ва фақат АҚШ фойдаланувчилари маълумоти асосида ишлайди.

Мутахассислар бу ўзгариш тармоқ фаолиятига таъсир кўрсатишини тахмин қиляпти. Бинобарин, бу янгилик иловадан фойдаланаётган 200 миллион америкалик фойдаланувчига айнан қандай таъсир кўрсатиши ҳозирча аниқ эмас.  

Ф.Яхшибоева, ЎзА