АҚШ-тың Теннесси штатында орналасқан «Accurate Energetic Systems» (AES) әскери снарядтар шығаратын зауытында болған күшті жарылыс салдарынан қаза тапқандардың есімдері ресми түрде жарияланды.

Оқиға 10 қазан күні таңертең Хикман округінде орын алған. Билік өкілдерінің мәліметінше, апат кезінде зауыт жұмысшыларының ешқайсысы аман қалмаған. Хикман және Хэмфрис округтерінің шерифтері Джейсон Крафт пен Крис Дэвис баспасөз жиынында қаза тапқандардың тізімін оқып, олардың отбасыларына көмек көрсету қажеттігін атап өтті.

Жарылыстың нақты себебі әзірге анықталған жоқ. Қазір Спирт өнімдері, темекі, қару-жарақ және жарылғыш заттар жөніндегі федералдық бюро (ATF) тергеу жұмыстарын жүргізіп жатыр.

Билік өкілінің айтуынша, есімдердің жариялануы мәйіттердің барлығы табылды дегенді білдірмейді — идентификация процесі әлі де жалғасуда.

Оқиға орнынан әуеден түсірілген кадрларда күйіп кеткен көліктер мен қираған ғимараттар анық көрінеді. Геологиялық қызмет жарылыстың қуаты 1,6 магнитудалы жер сілкінісіне тең болғанын хабарлады.