Луизиана штатында H5N1 құс тұмауына байланысты АҚШ-тағы алғашқы өлім жағдайы тіркелді.

Бұл туралы жергілікті денсаулық сақтау департаменті хабарлады. 

Луизиана денсаулық сақтау департаментінің мәліметінше, науқас 65 жастан асқан және қосымша аурулары болған. Вирус оған жабайы құстармен байланысқаннан кейін жұққан. Бұл штат аумағында тіркелген алғашқы жағдай, ал халық арасында H5N1 құс тұмауының таралу қаупі төмен деңгейде сақталып отыр.

Желтоқсан айының соңында АҚШ-тың Ауруларды бақылау және алдын алу орталығы (CDC) науқастан құс тұмауы вирусының мутациясы анықталғанын хабарлады. Скриппс институтының ғалымдары ескерткендей, бұл вирустың бір ғана өзгерісі H5N1 штаммын адамдар арасында тез таралатын ауруға айналдырып, жаңа пандемия толқынының пайда болуына әкелуі мүмкін.

Өткен жылы Дүниежүзілік денсаулық сақтау ұйымының эпидемиологы Ричард Пибоди әлем қауымдастығына адамнан адамға жұғуы мүмкін құс тұмауы салдарынан туындауы ықтимал жаңа пандемияға дайындық қажеттігін айтқан еді. Оның айтуынша, қауіп, әсіресе, ауылдық жерлерде және құс өсірумен айналысатын орташа табысты отбасылар үшін артуда.

Еске сала кетейік, 2023 жылдың сәуір айында Қытайдың оңтүстігіндегі Гуандун провинциясында тұратын 56 жастағы әйел құс тұмауының H3N8 штамын жұқтыру салдарынан қайтыс болған алғашқы адам ретінде тіркелген еді.