АҚШ пен Оңтүстік Корея әскері Солтүстік Корея тарапынан төнетін қауіптерге қарсы қорғаныс қабілетін нығайту мақсатында жыл сайын өткізілетін Ulchi Freedom Shield (UFS) бірлескен әскери жаттығуларын бастады.

Yonhap агенттігінің мәліметінше, 11 күнге созылатын маневрлер 28 тамызға дейін жалғасады. Бұл жаттығулар Сеул мен Вашингтон арасындағы қорғаныс серіктестігінің бір бөлігі ретінде ұйымдастырылып, Пхеньян тарапынан келетін «қатерлерге» қарсы тұруға бағытталған.

Биылғы жылы жаттығулар «нақты қауіп-қатерлер» сценариіне негізделген, оған шамамен 18 мың Оңтүстік Корея әскери қызметшісі қатысуда. Сонымен қатар, UFS аясында 580 мың адамның қатысуымен төрт күндік азаматтық қорғаныс жаттығулары, сондай-ақ дрондар мен кибершабуылдарға қарсы іс-қимыл машықтандырулары өтуде.

Сондай-ақ, Солтүстік және Оңтүстік Корея арасындағы шиеленісті жұмсартуға бағытталған әрекеттер аясында жоспарланған 40 далалық жаттығудың жартысы қыркүйек айына шегерілді.

Айта кетейік, Пхеньян бұл жаттығуларды дәстүрлі түрде «басқыншылықтың дайындығы» деп есептейді, ал АҚШ пен Оңтүстік Корея олардың тек қорғаныс мақсатында жүргізілетінін мәлімдеуде.