АҚШ президенти Дональд Трамп кутилмаганда Украинадан сулҳ тузишни талаб қилмаслигини айтди.

“TheNew York Times” газетасига кўра, Трамп Россия президенти Владимир Путин билан телефон орқали мулоқотдан сўнг, у “Россия ва Украина можарога ўзлари ечим топиши керак”, деб айтган. Шунингдек, Трамп янги санкцияларни жорий этиш бўйича Европа кампаниясида иштирок этишдан бош тортган.

Бу қарор Германия Канцлери Фридрих Мерцга жиддий зарба бўлди. У аввалроқ РФ расмийларига мурожаат қилиб, Трамп билан биргаликда Украинани қўллаб-қувватлаш учун барча имкониятларни ишга солишга, шу жумладан, санкцияларни кенгайтиришга ваъда берган эди. Бироқ энди Вашингтондан ҳеч қандай ёрдам йўқлиги маълум бўлмоқда.

Шундай қилиб, эндиликда Европа раҳбарлари иттифоқчисиз қолмоқда, дейиш мумкин.

Германия ҳукумати вакили “Bild” нашрига берган интервьюсида Россияга нисбатан санкциялар босими давом этаётганини таъкидлаган. Шунингдек, Европа Иттифоқи 17-санкция пакетини ишга туширганини, Европа комиссияси эса энергетика ва молия соҳаларида янги чекловларни ишлаб чиқаётганини айтган. 

Манбалар ушбу ҳолат Мерцнинг ташқи сиёсатдаги обрўсига путур етказиши мумкинлигини ёзмоқда.

Сардор Поёнов, ЎзА