Қўшма Штатлар президенти космос бўйича келгуси беш йилга мўлжалланган кескин ва амбицияли режаларни очиқлади.

Ушбу ҳужжатда 2028 йилга бориб Ойга инсонларни юбориш, 2030 йилгача у ерда доимий база яратиш, келажакда Марсга биринчи бўлиб етиб бориш ва космосда мудофаа салоҳиятини кучайтириш асосий устувор вазифалар сифатида белгиланган.

Таъкидланишича, NASA ва халқаро ҳамкорлар “Artemis” дастури доирасида Ернинг табиий йўлдошига боришга тайёргарликни жадаллаштирмоқда. Шу билан бирга, Трамп маъмурияти космик учиришларни арзонлаштириш ва бунга хусусий компанияларни фаолроқ жалб қилиш ва космосни иқтисодий маконга айлантиришни мақсад қилган. 

Трамп имзолаган фармонда космик хавфсизлик масаласига ҳам алоҳида урғу берилган. Ракетага қарши тизимлар, жумладан, “Олтин гумбаз” деб аталган кўп қатламли мудофаа лойиҳаси орқали Ер атрофидаги орбитадан келиши мумкин бўлган таҳдидларга қарши имкониятлар кенгайтирилади. Ушбу тизим баллистик ва гипертовушли ракеталар, дронлар ҳамда эҳтимолий космик қуролларни аниқлаш ва бартараф этишга қаратилган.

Шунингдек, космосга ядро реакторларини жойлаштириш, Халқаро космик станцияни 2030 йилга келиб хусусий орбитал платформалар билан алмаштириш ва Марсга учиш учун “Ой–Марс” занжирли стратегияни тезлаштириш режалари ҳам илгари сурилган. 

“Euronews” ёзишича, Трамп маъмурияти бу орқали космосдаги етакчиликни мустаҳкамлаш, ҳарбий ва иқтисодий устунликни узоқ муддатга кафолатлашни кўзламоқда.

Экспертлар фикрича, янги стратегия нафақат илм-фан ва технологиялар пойгасини, балки космоснинг глобал сиёсатдаги ўрнини ҳам тубдан ўзгартириши мумкин.

Мусулмон Зиё, ЎзА