Дональд Трамп маъмурияти ва Пентагон Киевга АҚШнинг НАТО бўйича иттифоқчилари томонидан молиялаштириладиган илк ҳарбий кўмак ҳужжатини маъқуллади, деб ёзди “Reuters” агентлиги манбаларга таяниб.

— Пентагон томонидан “Устувор эҳтиёж рўйхати” номли янги тизим асосида жами 500 миллион долларлик иккита ёрдам тўплами тасдиқланди, — дейилган нашр тарқатган хабарда.

Ўтган ой бошида Украина мудофаа вазири Денис Шмигаль АҚШ ва НАТО Киевни “PURL” ташаббуси орқали қўллаб-қувватлаш бўйича янги тизим ишга тушираётганини эълон қилганди. Бу дастур альянс давлатлари ихтиёрий равишда дарҳол қурол етказиб беришни назарда тутади.

Ўз навбатида Россия Украинага қурол етказиб берилиши муаммони ечишга тўсқинлик қилишини таъкидлаб келади. Москва фикрича, НАТО давлатлари тўғридан-тўғри низога қўшилиб, олов билан ўйнашмоқда.

С.Раҳимов, ЎзА