АҚШ президенти дунёдаги етакчи нефть ва газ ишлаб чиқарувчиларни ёқилғига бўлган нархнинг рекорд даражада қимматлашувига чек қўйиш учун хомашё қазиб олиш миқдорини оширишга чақирди, деб баёнот берди АҚШ энергетика вазири Женнифер Грэнхолм.

"Бу гап ОПЕКка ҳам, ўзимизнинг ички нефть ва газ ишлаб чиқарувчиларга ҳам тегишли", — дея аниқлик киритди у CNN телеканалига берган интервьюсида.

Келаси ҳафтада Грэнхолм Америка нефтгаз компаниялари раҳбарлари билан учрашишни режалаштирган. Учрашувда қайта ишлаш қувватидаги етишмовчиликлар муаммоси муҳокама қилиниши кутилмоқда.

Вазир интервью берган чоғида  экспертлар учинчи чоракликда бир галлон бензин нархи беш доллардан 4,27 долларга тушишини айтаётганини таъкидлаб ўтган. Шу билан бирга, у ушбу ҳисоб-китоблар дунёда юз бераётган воқеалар туфайли ўзини оқламаслиги ҳам мумкинлигини  қўшимча қилган.

"Масалан, агар Европа Иттифоқи Россия нефтини умуман олмай қўйса, бу нархларга босим ўтказади. Қолаверса, агар Хитой иқтисодиёти пандемиядан сўнг эртароқ очилса ҳам ёқилғига бўлган талаб ошиши мумкин", — деган вазир.