Эрон ҳокимияти намойишчиларни қатл этмаслигини маълум қилди. АҚШ эса, кўринишидан, мамлакатга ҳарбий зарба бериш режаларини кейинга суриб, эронлик амалдорларга нисбатан санкциялар жорий этилганини эълон қилди, деб хабар берди Euronews.

Эрон расмийлари мамлакат бўйлаб маҳаллий қамоқхоналарда сақланаётган минглаб намойишчиларни қатл қилиш нияти йўқлигини билдирди. Бу ҳақда Ислом Республикаси ташқи ишлар вазири Аббос Арагчи журналистларга берган интервьюсида айтди.  

Шу билан бирга, тартибсизликлар вақтида ҳибсга олинган Эрфан Солтанига олий жазо тайинлангани ҳақидаги хабарларни рад этди.  

26 ёшли Солтани Теҳрон яқинидаги Караж шаҳридаги қамоқхонада сақланмоқда. Суд идоралари баёнотига кўра, унга “исломий тузумга қарши тарғибот олиб бориш” ва “миллий хавфсизликка таҳдид солувчи ҳаракатлар” айби қўйилган. Шу билан бирга, бу айбловлар учун ўлим жазоси эмас, балки қамоқ жазоси кўзда тутилгани таъкидланади.

Аввалроқ ОАВда Солтанини 14 январь куни қатл этиш режалаштирилгани ҳақида хабарлар тарқалган эди. Суд органлари Солтани ҳибсга олинганидан тўрт кун ўтиб, унинг оиласига Эрфанга ўлим ҳукми чиқарилгани ва тасдиқланганини айтган.  

Манбаларнинг таъкидлашича, Солтанининг иши адолатли суд муҳокамасининг энг минимал талабларига ҳам риоя қилинмаган ҳолда кўриб чиқилган. У ҳибсга олинган пайтдан ҳукм чиқарилгунига қадар ўз танловига кўра адвокат ёллаш ва бошқа ҳуқуқий кафолатлардан маҳрум этилган.

Солтанидан ташқари, ҳуқуқни ҳимоя қилувчи ташкилотлар маълумотларига кўра, яна 10 мингдан ортиқ намойишчи ҳибсда сақланмоқда. Норозилик намойишларининг илк кунлариданоқ улар ўлим жазоси қўлланишидан жиддий хавотир билдириб, халқаро ҳамжамиятни вазиятга аралашишга чақирган.  

Эронда ҳукуматга қарши чиқишлар пайтида ҳалок бўлганлар сони 2,5 мингдан 15 минггача етади, дейилмоқда. Бу маъумотларни Euronews телеканали мамлакат ичкарисидаги манбаларга таяниб келтирган.  

Дональд Трамп, агар ўлим ҳукмлари ижро этилса, “жуда қатъий чоралар” кўрилишини айтган ва бу билан ҳарбий аралашув эҳтимолига ишора қилган.  

Чоршанба куни АҚШ президенти ўз ихтиёридаги маълумотларга таяниб, “Эронда қотилликлар тўхтагани”ни ва маҳаллий ҳокимият намойишчиларни оммавий равишда қатл қилиш ниятида эмаслигини билдирди.

Франс Пресс агентлиги манбаларига кўра, Саудия Арабистони, Умон ва Қатар ҳукумати Трампни Теҳронга “иккинчи имконият” беришга ва зарба бермасликка кўндирган. Улар АҚШ президентини ҳарбий аралашув нефть бозорларини кескин ларзага солишидан огоҳлантирган.  

Шу билан бирга, АҚШ ҳукумати намойишларни бостиришда алоқадор деб ҳисобланган эронлик амалдорларга нисбатан санкциялар жорий этилишини эълон қилди. Санкциялар активларни музлатиш ва АҚШ компанияларига рўйхатга киритилган шахслар билан бизнес юритишни тақиқлашни ўз ичига олади. Хуллас, Эрон агар намойишчиларга нисбатан кескин чоралар қайта қўлласа, АҚШнинг ҳарбий режаси яна кун тартибига чиқиши мумкин.  

<iframe width="650" height="420" src="https://www.youtube.com/embed/IG0DSsDIVUo" title="AQSH hozircha Eronga zarba berishdan voz kechdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ҳозирча санкциялар сақланиб қолмоқда.

Кенжа Бекжонов, Улуғбек Тўхтаев, ЎзА