Губернатор Гэвин Ньюсом АҚШ Президенти Миллий гвардия аскарларини Калифорнияга киритгани учун судга берди. Дональд Трамп эса ўз ҳукуматидан бу губернаторни ўз штатида федерал ҳаракатларга тўсқинлик қилишда давом этса, ҳибсга олишни сўрамоқда. Айни пайт Пентагон Лос-Анжелесга денгиз пиёдаларини ҳам юборган. Маҳаллий расмийлар “штат мустақиллигига раҳна солгани” учун мамлакат етакчисини айбламоқда.

Ньюсом Трампнинг ҳаракатини “ноқонуний ва ахлоқсизлик” деб атади. Душанба куни тушдан кейин 1000 га яқин Миллий гвардия хизматчиси норозиликни бостириш учун шаҳарга кирган. Ҳодиса жойига қўшимча яна 1000 нафар ҳарбий келиши кутиляпти.

Шимолий қўмондонлик берган баёнотда Пентагон норозиликни бартараф этишга ёрдам бериш учун 700 нафар денгиз пиёда қўшини вакилини жўнатгани айтилган.

Губернатор Трампдан норози:

– Буйруғингизни бекор қилинг, назоратни Калифорнияга қайтаринг!

Трамп эса, ўз навбатида, қилган ишини тўғри ҳисоблаяпти. Яъни, “Акс ҳолатда шаҳар бутунлай вайрон бўларди” дея ўзини оқламоқда.

Губернатор бундай ҳолат олдин кузатилмагани, штатга губернатор сўровисиз ҳеч қачон Миллий гвардия қўшини киритилмаганини таъкидлаган. Маҳаллий ОАВ олдида сўзга чиққан Ньюсом штат Трамп маъмуриятини судга беришини яна бир бор такрорлаган.

Калифорния Бош прокурори Роб Бонта фикрича, ҳарбийларни жалб этишга асос бўладиган муҳожирлар қўзғолони ёки бошқа жиддий сабаб йўқ. Аксинча, қўшин кириб келиши кўпчилик аҳолида норозилик уйғотган.

Трамп ва унинг чегарага масъул ҳарбий қўмондони Том Холман эса губернатор билан гаплашгани, агар намойишчиларга қарши курашга тўсқинлик қилса, у қўлга олинишини айтган.

Лос-Анжелесда норозилик намойишлари давом этяпти. Кеча шаҳар ҳокимияти рўпарасидаги боғда таниқли касаба уюшмаси етакчиси ушланишига қарши намойишда жуда кўп оломон йиғилган. Улар Трамп маъмурияти, Муҳожирот ва Божхона назоратидан норозиликларини билдирган. Шунингдек Касаба уюшмаси етакчиси Дэвид Уэртани тезда озод қилишни талаб қилган.

Бундай талаб билан бошланган намойиш турли касаба уюшмалари раҳбарларини бирлаштирди. Натижада Уэрта 50 000 доллар гаров эвазига озод қилинди. Намойиш чоғи Лос-Анжелес аҳолиси тартибсизлик сабаб юзага келган ноқулай вазиятни бартараф этиш талабини ҳам илгари сурди.

Лос-Анжелес мэри Карен Басс ОАВга интервьюсида ўз хавотирини ошкор қиларкан, Миллий гвардиячилар томонидан тез-тез иммиграция рейди ўтказилиши ҳолатни баттар салбий томонга ўзгартиришини таъкидлаган. Хуллас, Трамп маъмурияти кўраётган қатъий чоралардан штат аҳолиси жуда норози.

К.Бекжонов, ЎзА