Якшанба куни Буркина-Фасода ҳарбийлар исёни уюштирилгани ҳақида хабар тарқатилган эди. Хабарларда айтилишича, президент Каборе якшанба кунидан буён оммага кўриниш бермаяпти. Унинг истеъфо бергани ҳақида сиёсий доиралар ва хавфсизлик кучлари манбаларига таяниб Рейтер агентлиги маълум қилган эди.

Шундан буён айрим оммавий ахборот воситалари Буркина-Фасо президенти Рош Марк Каборе мамлакатда уюштирилган ҳарбийлар исёнидан кейин истеъфо бергани ҳақида хабар бера бошлади. 

Масалан,  LSI Africa портали Рош Марк Каборе оиласи Буркина-Фасони тарк этгани, ҳарбий исёнчилар президентга истеъфо бериш талабини қўйгани ҳақда ёзди. Шунингдек, айрим хабарларда президент жандармерия кучлари томонидан қўриқланаётгани ҳақида ҳам айтилганди. 

Буркина-Фасодаги сиёсий вазият халқаро ҳамжамиятни бефарқ қолдирмаяпти. Куни кеча АҚШ маъмурияти исёнчилар томонидан ҳибсга олинган Буркина-Фасо президенти ва бошқа бир қатор ҳукумат вакилларини зудлик била озод этишга чақирди. Бу ҳақда  давлат департаментининг расмий вакили Нед Прайс брифингда маълум қилгани айтилмоқда. 

Аввалроқ Буркина-Фасо ҳарбийлари президент Рош Марк Каборе истеъфога чиқарилгани ва ҳукумат тарқатиб юборилгани, конституцияга амал қилиниши тўхтатилгани ҳақида баёнот берган эди. 

"Биз Буркина-Фасо президенти мамлакат ҳарбийлари томонидан ушлаб турилганидан хабардормиз. Бизнинг Уагадугудаги элчихонамиз вазиятни кузатиб турибди. Президент Каборе ҳамда ҳукуматнинг бошқа аъзолари зудлик билан қўйиб юборилиши керак. Хавфсизлик кучларини Буркина-Фасо конституциясига амал қилишга ва фуқаролик ҳукуматни ҳурмат қилишга, барча томонни хотиржамликни сақлашга ва қарама-қаршиликларни ҳал қилиш учун ўзаро мулоқот бошлашга чақирамиз", — деган расмий вакил Нед Прайс.