Президент ташрифидан сўнг...

Тошкент вилоятидаги “Miss Lighting” корхонаси 1999 йилда ташкил топган. Компания 2019 йилда биринчилардан бўлиб 70 турга яқин лед-лампалар, 2022 йилда эса қандиллар ишлаб чиқаришни йўлга қўйган. Анқара шаҳрида “энг тез ривожланаётган компания” наминациясида биринчи ўринни эгаллаган.

Ўзбекистон Республикаси Президентининг 2025 йил 22 январда “Электротехника саноатини ривожлантиришни янги босқичга олиб чиқишга доир қўшимча чора-тадбирлар тўғрисида”ги қарори қабул қилинган. Ҳужжатда электротехника саноати ва унга ёндош соҳаларни ривожлантириш, юқори технологияли ҳамда қўшилган қийматли маҳсулотлар ишлаб чиқаришни рағбатлантириш борасида вазифалар белгилаб берилган.

Президент Шавкат Мирзиёев 13 февраль куни Оҳангарон туманига ташрифи доирасида мамлакатимиздаги электротехника маҳсулотлари ишлаб чиқарувчи корхоналарнинг кўргазмаси билан танишган эди. Давлатимиз раҳбарига маҳсулотларини намойиш қилган тадбиркорлар ичида “Miss Lighting” корхонаси таъсисчиси Умида Раҳмонова ҳам бор эди.

– Давлатимиз раҳбарининг ташрифи, жумладан, тақдимот ва тадбирлар ўзгача кайфиятда ўтди. Оҳангаронда янги барпо этилган электросаноат шаҳарчаси иқтисодий имкониятларни оширишга хизмат қилиши билан аҳамиятли бўлиб турибди. Шахсан ўзим мазкур саноат зонасига биринчи марта ташриф буюрганимда жуда ҳайратга тушганман. Зеро, давлатимиз раҳбарининг эътибори тадбиркорликка, хусусан, электротехника саноатига янги имкониятлар тақдим этмоқда, – деди У.Раҳмонова. – 2019 йилда корхонамизда дастлабки лед-лампалар ишлаб чиқаришни йўлга қўйдик. 70 хилдаги маҳсулотлар жуда харидоргир бўлиб, ҳар бир маркетда ўз ўрнини топди.

 2022 йилда эса преференциялар, тадбиркорликка кенг имкониятлар берилгани ортидан қандил ишлаб чиқаришга ҳам қўл урдик. 2024 йилда ташқи бозорга чиқдик – Дубай шаҳрида маҳаллий брендимизни ташкил этувчи савдо уйини очишга мувафақ бўлдик. Жорий йил Дубайда ундан ҳам йирик – икки минг квадратли иккинчи “шоурум”имизни очишни режалаштирганмиз.

Ташриф доирасида ишлаб чиқараётган маҳсулотларимизни намойиш этдик. Давлатимиз раҳбарининг соҳага бераётган енгилликлари туфайли кичикина дўкон йигирма етти йилда йирик халқаро компанияга айланди.

Бунинг яққол мисоли сифатида машҳур дизайнерлар, мода олами вакилларининг компаниямизга билдираётган қизиқишларини айтишим мумкин. Жумладан, дунёда “қалам билан туғилган” тахаллуси билан танилган, “ANDRIANE ROSSI” компанияси асосчиси Стефан Андриане биз билан боғланиб, миллий махсулотларимиз сифати, дизайнига юқори баҳо берди.

Машҳур дизайнер биз билан хамкорлик қилишни – Италиянинг Милан шаҳрида бўлиб ўтадиган “SALONE del Mobile/Milano” халқаро кургазмасида иштирок этишни таклиф килди. Бу таклиф Олимпия чемпионатига йўлланма олиш билан баробар, деб ҳисоблайман ҳамда ушбу тадбирда қатнашиб, олтин медални қулга киритиб, Ўзбекистон брендини дунёга танитишни ўз олдимга мақсад қилиб қўйдим.

Умида Раҳмонова, шунингдек, давлатимиз раҳбари билан бўлган мулоқот, билдирилган фикрлар, айтилган таклифларга ҳам алоҳида тўхталди.

Батафсил YouTube саҳифамизда томоша қилинг.

<iframe width="650" height="420" src="https://www.youtube.com/embed/vtTG75TriHk" title="AQSH birinchi xonimi e’tiboriga tushgan qandillar" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Беҳруз ХУДОЙБЕРДИЕВ,

Носиржон ҲАЙДАРОВ, 

Улуғбек ТЎХТАЕВ (видео), ЎзА