АҚШ Арманистон иқтисодиётига йирик инвестиция йўналтиришни режалаштирмоқда. "Bloomberg" нашри хабарига кўра, сармоянинг умумий миқдори 13 миллиард доллардан ошиши кутиляпти. Бу кўрсаткич 27 миллиард долларлик Арманистон йиллик ялпи ички маҳсулотининг қарийб ярмига тенг.

Расмий Вашингтон мазкур маблағ Арманистоннинг Россияга кўп йиллик иқтисодий ва энергетик қарамлигини камайтиришга хизмат қилишини таъкидламоқда. Ташаббус мамлакат иқтисодиётини диверсификация қилиш ва янги технологик йўналишларни ривожлантиришга қаратилган.

АҚШ вице-президенти Жей Ди Венснинг Арманистонга ташрифи доирасида, жумладан, фуқаролик атом энергетикаси соҳасида ҳам муҳим келишув имзоланди. Ушбу ҳужжатга кўра, 9 миллиард долларгача маблағ янги атом электр станциясини қуриш ҳамда замонавий технология етказиб беришга йўналтирилади. Шунингдек, қарийб 4 миллиард долларлик сунъий интеллект лойиҳалари йўлга қўйилади.

Умуман, бу ташаббус Арманистонни энергетика ва юқори технологиялар соҳасида янги босқичга кўтариши мумкин.

Ф.Яхшибоева, ЎзА