Қазақстанның Ақмола облысыдағы Шортанды кентінде газ баллоны жарылып, 3 адам көз жұмды, тағы он адам ауруханаға түскен.
«ҚазАқпарат» агенттігінің хабарлауынша, оқыс оқиға жергілікті уақытпен түнгі сағат 22:00 шамасында Шортанды кентінде Линейная көшесі 28 мекен-жайы бойынша орналасқан үш пәтерлі тұрғын үйде болды. Газ баллонының жарылуы салдарынан 3 пәтерлі жеке үй өртеніп, оның бір бөлігі құлады.
Қазірге дейінгі мәлімет бойынша, үйіндінің астынан үш адамның денесі табылған. Оның біреуі кәмелеттік жасқа толмаған бала. Сонымен бірге, түрлі деңгейдегі дене күйігімен 10 адам ауруханаға жатқызылды, оның ішінде балалар да бар. Кейбір зардап шеккендердің жағдайы ауыр.
«Қазіргі уақытта зардап шеккен 11 адам, оның ішінде бес ересек адам және алты бала бар. Зардап шеккен 10 адам ауруханаға жатқызылды. Жағдай өте күрделі. Қазірдің өзінде санитарлық авиация бойынша хирургтер, соның ішінде балалар хирургтары жіберілді. Қаза болғандардың саны артуы мүмкін», - деген аймақтың бас дәрігері.