Хитойлик 36 ёшли Ли Ся оғир жисмоний чекловларга қарамай, замонавий технологиялар ёрдамида “ақлли” ферма бошқарув тизимини яратишга муваффақ бўлди. У болалигида мушак дистрофияси ташхиси билан рўйхатга олинган бўлиб, касаллик тез ривожлангани сабабли мактабни эрта тарк этишга мажбур бўлган. Йиллар давомида унинг соғлиги янада ёмонлашиб, мустақил ҳаракатланиш ва овқатланиш имкониятидан айрилган, ҳозирда эса фақат сунъий нафас олиш аппарати ёрдамида нафас олади ва танасида фақат битта бармоғини қимирлатиш имконияти қолган.

Шунга қарамай, Ли 25 ёшида ҳаётини ўзгартиришга қарор қилиб, дастурлашни ўрганишни бошлаган. Компьютер билан танишуви синглиси олиб келган дарсликлар орқали бошланган ва у билимларни мустақил равишда эгаллаган. Кейинчалик у гидропоника — тупроқсиз деҳқончилик технологияси билан қизиқиб, уни амалда қўллашга киришган. Натижада Ли виртуал клавиатура ёрдамида, атиги битта бармоғи орқали бутун ферма тизимини бошқарадиган дастур яратган.  

Ферма билан боғлиқ жисмоний ишларни онаси бажариб, ўғлининг аниқ кўрсатмаларига амал қилган ҳолда ускуналар ва роботларни йиғишни ўрганиб олган. Ҳозирда Лининг фермаси барқарор даромад келтирмоқда. У келажакда ишлаб чиқариш ҳажмини ошириш, янги технологияларни жорий этиш ва маҳсулот турларини кенгайтиришни режалаштирмоқда.  

<iframe width="560" height="315" src="https://www.youtube.com/embed/-r9viT8spXE?si=Iw98yDUH_9LsIiXf" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА