“Апартак” кони ўз тарихида илк бор 1 миллион тонналик маррани забт этди. Агар ушбу кон йилига ўртача 387,5 минг тонна кўмир қазиб чиқариш қувватига эгалигини инобатга олсак, ушбу кўрсаткич салмоғи юқори эканлиги ойдинлашади.
Хусусан, 1 миллиард 800 минг тонналик захирага эга бўлган “Ангрен” кўмир кони 1968 йилдан фаолиятини бошлаган. 2001 йилда эса “Апартак” очиқ акциядорлик жамияти ташкил этилди. Ҳозирги кунда ушбу кон “Ўзбеккўмир” акциядорлик жамияти таркибида фаолият кўрсатмоқда.
Сўнгги йилларда конда устки қатламни очиш ва кўмир қазиб чиқариш ҳажмлари кўпайиб борилмоқда. Агар 2016 йили бу ердаги конда 152,1 минг тонна кўмир қазиб чиқарилган бўлса, 2020 йилда бу кўрсаткич 355,1 минг тонна, 2020 йилда 456,0 минг тонна ва 2021 йилда эса 767,8 минг тоннани ташкил этди. Ўтган йили ўз навбатида 831,4 минг тонна кўмир қазиб олинди. Кон жамоаси жорий йилда 1 миллион 350 минг тонна ёқилғи қазиб чиқаришни режалаштирилган. Бу борадаги тўққиз ойлик режа муддатидан олдин ортиғи билан адо этилди.
‒ Конга замонавий кон-техникалари бириктириб берилгани туфайли ишлаб чиқариш оширилмоқда, ‒ дейди ташкилотнинг бўлим бошлиғи Лутфулла Носиров. – Раҳбарият томонидан ишни тўғри ташкил этилаётгани, ўз касбини чуқур ўзлаштирган мутахассисларнинг ғайрат-шижоати ҳам ютуқларнинг омили бўлмоқда. Икки юз йигирма киши меҳнат қилаётган корхонага бу йил 90 тонна юк кўтариш қувватига эга ўнта “Komatsu” русумли автосамосвал ва бошқа замонавий кон-техникалари бириктирилди. Ҳозирги кунда бу ерда гидравлик экскаваторлар, бульдозер, автокран, автогрейдер, бурғилаш қурилмаси ва конвеер линияси каби техникалардан унумли фойдаланилмоқда.
Маълумот ўрнида шуни айтиш мумкинки, ҳозирда “Ўзбеккўмир” акциядорлик жамият тасарруфида учта кон фаолият кўрсатмоқда. Ўтган йили бу ерда 5,8 миллион тонна қаттиқ ёқилғи қазиб олиниб, ички бозорга йўналтирилган. Жорий йилда Ангрен кончилари 6,2 миллион тонна кўмир қазиб олишни режалаштирган. Тўққиз ойда бу кўрсаткич 4 миллион 739,7 минг тоннани ташкил этди. Бу режадагидан 363,1 минг тоннага кўп деганидир.
А.Мусаев,ЎзА.