Португалияда бўлиб ўтган президентлик сайловларининг иккинчи босқичида мухолифатдаги Социалистик партиядан номзод Aнтониу Хозе Сегуро 66,2 фоиз овоз билан ғалаба қозонди. У учинчи муддатга сайланиш ҳуқуқига эга бўлмаган Марсело Ребело де Соуза ўрнига янги президент бўлди.

Ўлка Миллий сайлов комиссияси расмий маълумотларига кўра, сайловда 11 миллиондан ортиқ фуқаро иштирок этган. Таъкидланишича, Сегуро 66,2 фоиз, ўта ўнгчи “Chega” партияси етакчиси Aндре Вентура эса 33,8 фоиз овоз тўплаган. Шу тариқа, 63 ёшли Сегуро 1974 йилдан кейин мамлакат демократик тарихида Португалиянинг саккизинчи президенти бўлди.

– Мақсадим - ватанга хизмат қилиш, -деди Сегуро журналистларга берган қисқача интервьюсида. – Португал халқи бизнинг демократиямизга улкан садоқатини намойиш этишди. Мен ўз халқимнинг ишончини оқлайман.

Сегуро 2011-2014 йилларда Социалистик партияни бошқарган ва 2001 йилдан 2002 йилгача Бош вазир ўринбосари лавозимида ишлаган. 

Жорий йилнинг 18 январь куни бўлиб ўтган биринчи турда Сегуро 31 фоиз, Вентура эса 23 фоиз овоз олиб, иккинчи босқичга йўлланма олганди. Ҳукмрон Социал-демократик партия номзоди Луис Маркес Мендес атиги 11 фоиз овоз олиб, “пойга”дан чиқиб кетди.

Маълумотларга кўра, Португалиядаги ҳозирги сиёсий ва иқтисодий вазият ижтимоий тенгсизлик, паст иш ҳақи, уй-жой олишдаги қийинчиликлар билан кечмоқда. Охирги икки йилда иқтисодий ўсиш 2 фоиз атрофида бўлган ва ишсизлик 6 фоиздан сал юқорироқ бўлган ўлкада сўнгги йиллардаги энг йирик умумий иш ташлаш ўтган йил 11 декабрь куни бўлиб ўтди.

Гўзал Сатторова, ЎзА