Анор ҳақида сўз юритилса, кўз олдимизга Дашнабод ёки Варганза анорлари келади.

Аслида ҳам юртимизда анор етиштиришнинг икки мактаби бўлиб, унинг бири водийда иккинчиси эса воҳа вилоятлари ҳисобланади.

Биз эса Ўзстандарт агентлиги уюштирган медиа турда иштирок этиб, Сирдарё вилояти, Мирзаобод туманидаги Деҳқонобод маҳалласида ҳам анорчилик мактабига асос солинганига гувоҳ бўлдик. Ўтган асрнинг 40-50 йилларидан бошлаб, анор кўчатлари экилган бу маҳаллада 2020 йилда 5,5 минг тоннадан ортиқ анор етиштирилди.  

120 та корхона, фермер ва томорқа хўжаликларни таркибида бирлаштирган Сирдарё вилояти, Мирзаобод тумани “Deхqonobod Asl Anori” ишлаб чиқариш кооперативи кооперация асосида анор етиштириш ва қайта ишлашни йўлга қўйган. Бугун ушбу корхонага Global G.A.P. халқаро тан олинган стандарт сертификати топширилди.

– Global G.A.P. тижорат сертификати бўлиб, у 130 ортиқ давлатда тан олинган, – дейди Ўзстандарт агентлиги бошқармаси бошлиғи Асқарали Асқаров. – Айни вақтда дунёдаги 210 мингдан ошиқ фермер хўжалиги ундан фойдаланиб, маҳсулотини сотмоқда. Ушбу сертификатнинг 250 ортиқ талаби бўлиб, ана шунинг камида 95 фоизига жавоб берган корхонага сертификат берилади. Бунда ишлаб чиқариш жараёнидаги тозалик, маҳсулотнинг хавфсизлиги, қисқаси уни уруғини қадашдан тортиб, дастурхонга етиб боргунча бўлган ҳолат назоратга олинади. Сертификатга қўшиб бериладиган номерлардан импортёр корхона унинг қанчалик ишончли эканига амин бўлади.

Қайд этиш керакки, 2019 йилда юртимизда бундай сертификат эгалари сони иккита бўлган бўлса, ҳозирда 228 тага етди. Жорий йилда уларнинг сони яна ортиши кутилмоқда.

– Чекка қишлоқнинг тадбиркорига бундай сертификатнинг берилгани жуда катта ютуқ, биз унинг барча талабларини бажаришга эришдик, – дейди Сирдарё вилояти, Мирзаобод тумани “Deхqonobod Asl Anori” ишлаб чиқариш кооперативи бошлиғи Исроил Неъматов. – Ана шу жараёнда биз деҳқончилик маданиятини ва тижоратини ўргандик.  

 Мисол учун, анор шарбатида нордонлик кучли. Шу боис пластмасса идишларда узоқ сақлаб бўлмайди. Шарбатдаги табиийлик йўқолади. Биз эса атсетик қопларда сақлашни йўлга қўйдик, уларда бир ярим йил бемалол туради. Россиядан талаб тушди, 200 литрлик флагда шарбат қадоқлаш борасида. Ҳозир намуна учун қилиб кўраяпмиз, 60 кундан буён турибди, унинг таркиби ўзгармади. 2021 йилда Россиядаги йирик фирмага шу шаклда  маҳсулот етказиб бериш борасида шартнома тузганмиз.

Ўзстандарт агентлиги вакиллари топширган Global G.A.P. сертификати “Deхqonobod Asl Anori” ишлаб чиқариш кооперативи маҳсулотларига дунё бозорида кенг йўл очди. Айни вақтда Голландиядан олиб келинган замонавий ускунада анор пўстлоғи арчилиб, донидан шарбат олинмоқда. Бу йилдан беҳи шарбати ҳам тайёрлаш мўлжалланмоқда.  

<iframe width="1366" height="657" src="https://www.youtube.com/embed/0C9rYry2IqA" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Сайёра ШОЕВА, Нишонбой Абдувоитов (ЎзА)