Швейцария билан Англия терма жамоалари ўз гуруҳларида биринчи ўринни эгаллаб 2022 йилда Қатарда бўлиб ўтадиган футбол бўйича жаҳон чемпионатининг финал учрашувларига йўлланмани нақд қилиб қўйди.

Гуруҳ ўйинларининг сўнгги даврасида швейцарияликлар ўз уйида Болгария терма жамоасини 4:0 ҳисобида мағлубиятга учратган бўлса, инглизлар сафарда Сан-Марино терма жамоаси устидан 10:0 ҳисобида ғалаба қозонди. Бу ҳисоб инглизларнинг Жаҳон ёки Европа чемпионатига саралаш ўйинлари тарихидаги энг йириги бўлди.
 
Шундай қилиб швейцарияликлар С гуруҳида 10 та ўйин ўтказиб 18 очкога эга бўлишди. Инглизлар эса I гуруҳида 10 ўйиндан 26 очко тўплаган.
 
Италия ва Польша жамоалари жаҳон чемпионатига чиқиш учун плей-оффда ўйнайдиган бўлди. Россия, Австрия, Шимолий Македония, Уэльс, Чехия, Шотландия, Португалия ва Швеция ҳам курашни плей-офф ўйинларида давом эттиради.
 
Футбол бўйича жаҳон чемпионати 2022 йил 21 ноябрдан 18 декабргача Қатарда бўлиб ўтади. Ҳозиргача, жаҳон чемпионатининг финаль ўйинлари қисмида иштирок этиш ҳуқуқини Бельгия, Бразилия, Германия, Испания, Сербия, Франция, Хорватия миллий терма жамоалари қўлга киритган. Қатарликлар мусобақа мезбони сифатида финаль ўйинларига тўғридан-тўғри чиқади.