Ўш шаҳрида Андижон вилояти ва Ўш области эркаклар ва аёллар волейбол жамоалари ўртасида ўртоқлик учрашуви бўлиб ўтди.

Андижон вилояти туризм ва спорт бошқармаси матбуот хизмати хабарига кўра, ўртоқлик учрашуви олдидан ташкил этилган тадбирда сўз олганлар кейинги йилларда қўшни Ўзбекистон ва Қирғизистон Республикалари ўртасида санъат, спорт, туризм, таълим ва бошқа кўплаб йўналишларда ҳамкорлик кўлами кенгайиб, мустаҳкамланиб бораётганлиги таъкидланган. Икки давлат ҳамкорлиги доирасида Андижон вилояти Туризм ва спорт бош бошқармаси ҳамда Қирғизистон Республикаси Ўш области Жисмоний тарбия ва спорт, ёшлар ишлари бошқармаси ўртасида жорий йилда ҳамкорликда оммавий спорт тадбирларини ўтказиш юзасидан меморандум имзоланган эди. Меморандум доирасидаги спорт мусобақалари тақвимига кўра, Андижон вилояти эркаклар ва аёллар волейбол жамоалари Ўш шаҳрида Ўш области жамоаси билан ўртоқлик учрашуви ўтказди. 

[gallery-5209]

Учрашув якунида мутасаддилар томонидан икки давлат ўртасида спорт соҳасидаги ҳамкорлик алоқаларини давом эттиришга келишиб олинди.

 

Ф.УБАЙДУЛЛАЕВ, ЎзА