Андижон вилоятида жамоат транспорти тизимини модернизация қилиш ишлари изчил давом этмоқда. Вилоятга навбатдаги 40 та замонавий, экологик тоза электробус олиб келинди.

Сўнгги йилларда мамлакатимизда аҳолига кўрсатилаётган транспорт хизматлари сифатини ошириш, қулай ва хавфсиз жамоат транспортини йўлга қўйишга алоҳида эътибор қаратилмоқда. Шу мақсадда Андижон вилоятида ҳам Хитой Халқ Республикасида ишлаб чиқарилган “СAMBELL” русумидаги янги авлод электробуслари босқичма-босқич жорий этилмоқда.

Маълумки, ўтган йилнинг декабрь ойида вилоятга электробусларнинг илк партияси келтирилган эди. Эндиликда яна 40 та экологик тоза электробус олиб келиниб, янги ташкил этилган 2-электробус парки негизида шаҳар йўналишларига чиқариш учун тайёр ҳолга келтирилди.

Андижон вилояти ҳокими Шуҳратбек Абдураҳмонов мазкур электробус паркида бўлиб, унинг фаолияти билан танишди ҳамда навбатдаги электробусларни қабул қилишга бағишланган тадбирда иштирок этди. Тадбирда жамоат транспортини янада ривожлантириш, аҳоли учун қулайликлар яратиш, экологик тоза транспорт воситаларидан фойдаланиш кўламини кенгайтириш борасидаги ишлар изчил давом эттирилиши таъкидланди.

[gallery-27420]

Андижонга олиб келинган янги авлод электробуслари атмосферага зарарли моддалар чиқармаслиги, иқтисодий самарадорлиги ва эксплуатация қулайлиги билан ажралиб туради. Уларнинг жорий этилиши шаҳар аҳолисига кўрсатилаётган транспорт хизмати сифатини янада яхшилайди. 

<iframe width="640" height="420" src="https://www.youtube.com/embed/0CjX4XaVWjs" title="Andijonga navbatdagi elektrobuslar keltirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ф. Убайдуллаев,

З. Умрзоқов (фото), ЎзА мухбирлари