Махсус рухсатнома ёки тегишли ваколатга эга бўлмай, чеклов ўрнатилган ҳудудида машина бошқариб кетаётган ҳайдовчиларга нисбатан махсус рейдлар ўтказилмоқда.

Карантин даврида автомашиналарга рухсатнома олиш бўйича кўриб чиқилган аризалар нега рад этилгани ҳақда Давлат хизматлари агентлиги Андижон вилояти бошқармаси ахборот хизмати раҳбари Умиджон Мамарасулов изоҳ берди.

— Бизга 6 апрель кунига қадар 10960 та ариза келиб тушган. Шундан 9308 таси рад этилиб, 1016 та автомобилга махсус рухсатномалар берилди.

ДХА директорининг BMW Х7 ва Mercedes’ларига рухсат олишга ариза бераётган «уддабурон»ларга қилган мурожаатидан сўнг 636 та ариза қайтариб олинди. Яна юзга яқин ариза қимматбаҳо маркадаги автомашина эгаларига тегишли бўлиб, етарли асосга эга эмаслиги учун рад этилган. Шунингдек, стикер олиш тоифаларига мос келмаганларнинг аризалар юбориши, белгиланган ҳужжатларни тўлиқ тақдим этмаслик ҳолатлари ҳам рад жавоби берилишига асос бўлмоқда.